کپنک لر گولدن گوله قونورلار
باهار گلیر پنجره نی باغلاما
بنوشه لر کردیمیزه دولورلار
بولاغ آخیر سن گؤزه لیم آغلاما

یئنه قالدی اوزو قارالیق کؤموره
ظالیم شاختا ساراییندا گول بیتیر
ایلیق یئللر اسیر سئزاق یئرینده
یاز چمنده آچیب چیچکدن چتیر

گول دردیمیز بوزا دؤنوب اریسین
خزان وورموش آرزی باغی گول آچسین
یاز گتیرسین یئنیلیک ین نغمه سین
کؤنول لرده اومود دالی زوغ آتسین

گول اوچوشسون دوداق دوداق دردیمیز
سئوگی سئلی سارسین عومور یوللارین
کؤلگه لرده سارالماسین گولوموز
اسیر تورپاق دادین آلسین باهارین

شاعیر میرزا علی معجز شبستری تبریزین شمال شرقینده واقع اولان شبستر شهرینین اهلی دیر . او 1252 شمسی ایلینده آنادان اولوب و حاجی آغا آدلی بیر تاجیرین اوغلی دیر . میرزا علی تحصیلاتین بیر کؤهنه اصول مکتبینده مشغول اولموش و اؤز یازدیغینا گوره آتاسی اونون 16 یاشیندا اولان زامان وفات ائدیب و قارداشلاری اونی استانبولا دعوت ائتمیشدیلر . معجز استانبولدا چوخ حکایت و ادبیات و تاریخ صاحه سینده یازیلان رمان لارین اوخوماقی ایله مشغول اولموشدیر . معجز 30 یاشا چاتاندا غربتی ترک ائدیب و اؤز وطنی شبستره مراجعت ائتمیشدیر و ان عزیز اوقاتینی شیخ محمود شبسترلی نین توپراغی کناریندا کئچیریب و شعر یازماغا مشغول اولموشدیر .

اثرلریندن واضح گورونور کی شاعیر اجتماعی حیات باره سینده بؤیوک و گؤرکملی آددیملار گوتوروب . مثلا دئیر کی :

چون قاییتدیم وطنه آچما دهانین دئدیلر

دینمه دانیشما و ترپتمه زبانین دئدیلر

دئدیم اللاهه باخین ائتمه یین  آخر اولدوم

گر بوجور ائتمیه سن چوخدی زیانین دئدیلر

شاعیر اوز زندگانلیغیندا بئله یازیر :

"وطنه قایداندان سونرا یوردومون حالینی گؤروب نوحه خوانلیغا باشلادیم ! منیم نوحه خوانلیغیم آخوندلارین خوشونا گلمه دی و منه محاربه اعلانی ائتدیلر . 26 ایل ووروشدوم . خیرات وئردیلر منی دعوت ائتمه دیلر ، طوی اولدی منی چاغیرمادیلار ، یعنی یازدیم و گوشه کناردا باشا آپاردیم ."

او اؤز شعرلرینده خرافات اصول لاری و جهالت و ظلالته سوق ائدن عادت و مرض لری تنقید ائدوب ، اینسانلاری یاخشی شرح لر و گؤزل شعرلر وسیله سی ایله مدنیت و اجتماعی حقوق سمتینه سوق ائدیب و هئچ بیر زاددان قورخوسی یوخموش .

شعرلریندن نمونه لر عزیز اوخوجولاریما تقدیم اولونور ...

آ جیران                      8/1 MB   

گوزلریم                      7/2 MB

گوزلریمه باخان گلسین               2.6 mb

یارب منیم صبریمی وئر               2.3 mb

يیغدی خير و بركت سفره سين ، احسانیله گئتدی
امن امانليق دا يوكون باغلادی ، ايمانیله گئتدی

بيگ خان اولمازسا دئيه رديك اولاجاق كنديميز آباد
او خراب كتده ، و لاكن ائله بيگ خانیله گئتدی

(سيلو) داير اولالی ، هر نه دگيرمان ييغيشيلدی
آمما خالص تميز اوونلاردا ، دگيرمانیله گئتدی

مستبد سلطاني سالدوق ، كي اولا خلقميز آزاد
سونرا باخديق كي آزادليق دا او سلطانيله گئتدی

بير (بلی قوربان!) اولوب ايندی بيزه مين بلی قوربان
آمما (خلعت وئرن) اول بير بلی قوربانیله گئتدی

دوز مسلمانه ديئيرديك : قولاغی توكلو دی بدبخت
ايندی باخ ، گور كی او دوزلوك ده ، مسلمانیله گئتدی

وئرمه (صابر) دئدی ، او دولما فسنجانی آخوندا
آغزيميزدان دا داد ، اول دولما  فسنجانیله گئتدی

دئدی انسانيمیز آزدير ، هامي انسان گرك اولسون
آمما انسانليقمزدا ، او آز انسانیله گئتدی

بو قدر (دفتر) و (اسناد) له ، بير حقه چاتان يوخ
حق وئرنلر (پيتيگي) ميرزا قلمدانیله گئتدی

بيزه بير دين قالا بيلميشدي ميراث ، بيرده بو ايران
دين گئدنده دئدی : " تك گئتمه رم! " ايرانیله گئتدی

ايسته ديك قانلا يوواق ئولكه ميزين لكه سين ، آمما
ئولكه ميز خالص ئوزی لكه اولوب قانیله گئتدی

يورقانی اوغری قاپاندا ، دئدی ملانصرالدين :
نيله سين چيلپاغيدی ، اوغري دا يورقانیله گئتدی

هاوا انسانی بوغور باش باشا " گاز كربنيك " اولموش
يئل ده اسمير ، ائله بير ، يئل ده سليمانیله گئتدی

سو ، كرج دن " كلور " ايله گلی پاسلی دميرده
گوره سن " شاه سويی " تك چشمه نه عنوانیله گئتدی

تركی اولموش قدغن ، ديوانيميزدان دا خبر يوخ
"شهريارين" ديلی ده وای دئيه ، ديوانیله گئتدی

هر زامانکی باخیرام باشینا قار وار گورورم                   

اوغول اولموش آتا تک گوزلرین آغلار گورورم

هر طرفدن چکیلیب سینه وه داغلار گورورم                 

آی آلان اوستونو غم چیسگینی ، هر یانی دومان

آی یاغان باشینا غملر اودو ، یاسلی ساوالان

گورموشوک یازدا کوچک لرده چیچکلر آچیلار                  

هر طرفدن چیمنین سینه سینه گول ساچیلار

ماهنی لار قوشماغا باشلار یئنه ده قوشماچیلار          

یاز گلیب گئتدی یئنه گولمه دین اوچ آیدا بیر آن

آی یاغان باشینا غملر اودو ، یاسلی ساوالان

قرنیلر گئچدی سنین گولمه دی بیر لحظه اوزون         

قانلی یاش توکدو سارالمیش اوزونه یاشلی گوزون

غصه دن دوندو قارانلیق گئجه اولدو گونوزون               

نه سوران حالینی اولدی نه وئرن جیسمیوه جان

آی یاغان باشینا غملر اودو ، یاسلی ساوالان

آند وئررم سنی او قانه بلنمیش داشووا                       

گئجه گوندوز او گوزوندن توکولن قان باشووا

اورگین دردینی بیلدیر او "سهند" قارداشووا                  

سنی وارلیق  سنی تانری  سنی بو آه و فغان

آی یاغان باشینا غملر اودو ، یاسلی ساوالان

سالارام یادیما بیر لحظه او گئچمیش لریوی               

توکولن سنگ جفائیله او دور دیشلریوی

ایزلرم بیر بیر او حئیرت یارادان ایشلریوی                    

هامی دان من سنین احوالینا آرتیق نیگران

آی یاغان باشینا غملر اودو ، یاسلی ساوالان

ساکیت اول ، آغلاما قوی بیرجه چکیلسین بو دومان      

گون چیخیب ظولمنی بیر یوللوقا قووسون بورادان

"نبی" گلسین ، بو آت اولسون یئنه داغلار آتیلان          

"هجر"ین بلکه یغیلسین گوزو یولدان ، آناجان

آی یاغان باشینا غملر اودو ، یاسلی ساوالان

سوندوره بیلمه دی گوز یاشین اورکدن اودووی              

چاغیریم قوی کومک ائتسین سنه اوز اولادیوی

افتخاریله بوگون ذیکر ائدرم پاک آدیوی                         

مرد اوغوللار بئجریب خلقه وئرن شوهرت و شان

آی یاغان باشینا غملر اودو ، یاسلی ساوالان

"بابکین"گئتدی سه بوش قالمادی آمما قوجاغین             

دولودور مین ائله اوغلانلاریلا هر بوجاغین

نه قدر یئل اسه طوفان قوپا سونمز اوجاقین                    

ای بلالر سپری ، خالقا یامان گونده آمان

آی یاغان باشینا غملر اودو ، یاسلی ساوالان

چنلی بئلده "ده لی لر " قوی یئنه قورسون بوساطی         

قوچ کوراغلو یئنه جولانه گتیرسین قیر آتی

هئچ زامان اصلین ایتیرمز او کی دوزگوندی ذاتی             

آند اولا آدیوا ، آی گوزلری آغلار ، یاشی قان

آی یاغان باشینا غملر اودو ، یاسلی ساوالان

سن دویوشلرده بیر آسلان کیمی دوردون ایاغا                

اوخ آتیلدیقجا بیزه سینه نی وئردین قاباغا

غم یئمکدن داها جانیم یئتیشیب دیر دوداغا                   

نه یامان گونلره گور قالدی بو احساسلی بالان

آی یاغان باشینا غملر اودو ، یاسلی ساوالان

بابالاردان بیزه قالمیش بو مثل هاممی بیلر                   

سو ٬ گلن آرخا دئیبلر یئنه بیر گون سو گلر

فلکین داش اورگین آه اوخو آخیردا دَئلر                         

"بارز" اوغلوندا یئتر سئودیگی یاره او زامان

آی یاغان باشینا غملر اودو ، یاسلی ساوالان

آذربایجان ادبیاتی نمونه لری ال تلفونی ایچون   121kb

یئنی ایل ده شادلیق لار ، سالامات لار ،گولر اوزلر آرزولییرام سیزه ...

ایشالله بو ایل آذربایجانیمیزا برکت لی اولسون ...

شاد یاشایین

بیر اوجا سسدی قولاق وئر اونا هایسیز گئجه لر

سارا بیر باغدی طبیعتدن آلیب قول بوداقی

بیر شیرین ماهنیدی یانلیز اوخویار ائل دوداقی

سارا بیر قیزدی سودان سورمه چکیب گؤزلرینه

جان دئییب بیرده اورکدن آرازین سؤزلرینه

سارا سئودا ایله دونیانی آتان بیر قیزدی

سارا غملر اوجاقینادا آلیشان بیر کؤزدی

بیر نجابتلی گلین دیر ائله آسلان سایاغی

قویمادی تار ائده دونیاسینی چاققال آیاقی

اؤزونو آتدی سئله اؤزگه نی حئیران ائله دی

او یانان شمعینی پروانه یه قربان ائله دی

قوشولوب سئللره گئتدی آنا یوردون ساراسی

قالدی شیرین اوره گینده یئنه فرهاد یاراسی

باغلادی ساچلارینی قویمادی بیگانه گؤره

آنا یوردون قیزی وئرمز ساچین هر کیمسه هؤره

گلین اولدو آرازا، اوردا تویون توتدو سارا

سؤیله دی اوردا اورک سؤزلرینی نازلی یارا

آراز آغلار گؤز ایله، آلدی سارا اللرینی

دارادی ائل قیزینین بیرده قارا تئللرینی

گئتدی گؤزلردن اوزاق دوشدو ائلین بیردنه سی

گؤرمه دی خان چوبانین آیریلیقین سون نفسی

سارا گؤزلردن اوزاق دوشسه ده ایتمز اثری

بیر یاراق تک سؤزونون واردی هله چوخ کسری

ایکیمیزده بیر اورک وار

                     یاری منده ، یاری سنده

سئوگی آدلی بیر آغاجیق

                     بوداق منده ، باری سنده



چیچک بیتر گول اوزونده

مین معنا وار هر سوزونده

بیر بولودوق گوی اوزونده

                    یاغیش منده، دولی سنده

بیراووچویام گوزوم اوودا

قاچ ها قاچدا ، قوو ها قوودا

عومروموز بیر شیرین سئودا

                   پتک منده ، بالی سنده

لايلالار آنالارين اوشاقلاري ياتيرتماق اوٍچون اوْخودوقلاري شعرلر دير.آذربايجان لايلالاري فورم

باخيميندان باياتي كيميدير . لايلالاري باياتيلار دان فرقلنديرن جهت ايسه اونون مضمونو دور . فورم

باخيميندان دا بير كيچيك فرق اؤزونو گؤسترمكده دير. اگر باياتيلارين اوّلي "عزيزيم" ، "من عاشيق "

، "عاشيغام" سؤزلريله باشلاييرسا ، لايلالار دا "لايلا" سؤزو يا "لايلا دئديم، لايلا دئييم "

سؤزلري گلير.

ايندي ايسه لايلالاردان بير نئچه سینی بوردا گتیریره م :

لايلا دئديم ياتاسان

قيزيل گوله باتاسان.

قيزيل گولون ايچينده

شيرين يوخو تاپاسان.

لايلاي بئشيگيم لايلاي،

ائويم ائشيگيم لايلاي

اوزون گئج هلر بويو

چكيم كئشيگين لايلاي.

لايلاي دئديم اوجادان

سسيم چيخمير باجادان

تانري سني ساخلاسين

چيچكدن ، قيزيلجادان .

لايلاي دئديم ياتينجا

گؤزلرم آي باتينجا

جانيم دوداغا يئتدي،

سن حاصيله چاتينجا.

لايلاي دئديم، جان دئديم،

يوُخودان اوْيان دئديم.

سن يوُخودان دوُرونجا

جانيمي قوربان دئديم.

لايلاي دئديم ياتاسان

شيرين يوخو آلاسان

شيرين يوخو ايچينده

مني يادا سالاسان.

بالامين يوخوسو گلير

لايلايي نين سسي گلير

اوزاق-اوزاق داغلاردان

بالامين داييسي گلير

لايلاي منه قالان لايلاي

شيرين ديللي بالام لايلاي

ساوالان...

نغمه سینی قوشلار باغ- باغ بـولنده،

من گوز آچـــیب، بو دونـــــیایا گلنده،

بخت اولدوزوم بورادا یانان اولوبدور

بير گون واريدي بير گون يوخ. سيز تانیماييب من گورمين اولکه لرين بيريسينده بير عاغيلي شاه وارميش. گونلرين بير گوني شاه وزير ساراي آداملاريله  بيرليکده دولان گرديشه چخيب يول لاري اوستونده بير قاري قوجاکيشي یه راست گليرلر.

شاه يانينداکي لارين ان عاغيلي اولانيني تانيماق اوچون بير آز فيکيرلشيب سونرا قوجانين يانينا گئدير ودئير کي : آي دونيا گورموش کيشي سندن اوچ سواليم وار سوروشسام جواب وئررسن؟

قوجا دئير : بيلسم جوابيني وئررم بيلمه سم اورگشره م ...

شاه دئير : آ قوجا دئ گوروم ايکيني اوچ ائلميسن؟

قوجا دئيير: بلي ،قوربان!

شاه دئيير: اوزاقي ياخين ائلميسن؟

قوجا دئيير: البت کي!

شاه دئيير: نئچه يول تالان اولوبسان ؟نئچه يول تالان ائیله ميسن؟

قوجا دئيير: اوچ يول تالان اولموشام ايکي يول تالان ائيلميشم!

شاه قوجايا احسنت دئييب، بوللي خلعت وئريب يوللارينا دوام ائديلر. اوتراق ائیلين يئرده شاه آداملارين بير آرايا يغييب دئيير کي: کيم دئيه بيلر کي من قوجادان نه سوروشدوم ؛ اودا منه نه جواب وئردي؟

هيچ کيم جواب تاپمادي ،هامي هويوخوب قالديلار کي نه دئسينلر. شاهين وزيري اردان چخيب تئز قوجانين يانينا گئديب دئيير کي: آ قوجا آتا ، شاه وئرن خلعت لرين تايین سنه وئررم دئ گوروم شاه نه سوروشدي ؟سنده نه جواب وئردين؟

قوجا بير آز گولوب دئدي:من خلعت ايستميرم.ياخشي قولاق آس...اوندا کي شاه مندن سوروشدي ايکيني اوچ ايله میسن منده دئدیم هه ! شاهين منظوري بو ايدي کي ايکي اياقين اوچ اولوب ! منده دئديم ايکي اياقيما بيرده چليک آرتيب ، اوندا کي شاه دئدي اوزاقي ياخين ائديبسن منده دئديم البت ! شاهين منظوري بو ايدي کي اوزاقي داها گورنميرسن چون قوجالميسان. اوچونجي سوالين جوابيدا بو جوردي کي شاه دئدي نئچه تالان اولوبسان ؟نئچه تالان ائليبسن منظوري او ايدي کي نئچه دفعه قيز اوغلان ائولنديرميسن ؟منده دئديم اوچ قيز اره وئريب اوچ يول تالان اولموشام ، ايکي اوغلان دا ائولنديريب ايکي دفعه ده تالان ائیله ميشم.

وزير درحال شاهين يانينا دونوب جوابلاري شاها دئيير.

عزيزيم كيمي گوزلر
تار چالان كيمي گوزلر
قاشون كيمي قاش اولماز
گوزلرين كيمي گوزلر

***

بو داغدا مه‌لر گلر
داغلاري انر گلر
نامرده توش اولانين
باشينه نه‌لر گلر؟

***

بو داغدا اكديم اكين
آلديلر اليمده كين
هيچ كافر هيچ مسلمان
اولماسين منيم تكين

***

بير قوش گلير آغ داشدان
خبر ويرير قارداشدان
قارداش باجيدان دويسا
باجي دويماز قارداشدان

***

بو گلن اوزون بيلمز
دانشسا سوزون بيلمز
هر گليب سو دولدوران
چشمه نين گوزون بيلمز

بوستانام تاغيم آغلار
غمدن ياپراغيم آغلار
ساغام اوزوم آغلارام
اولسم توپراغيم آغلار

***

بو دره نارين دره
گيتديكجه نارين دره
بوردا بر باغ سالديم
يار گله نارين دره

***

آي چيقدي قادر آللاه
تقصيريم نه در آللاه
يا منيم سووگوليمي
يا مني ئولدور آللاه

***

آغ آلما قيزيل آلما
نيمچه يه دوزول آلما
چيركين آل نجيب اولسون
بد اصيل گؤزه‌ل آلما

                                                                           عزیز دوستوم ایل قیزیندان تشکورلر

بسله میسن قوجاغیندا

حیدرخان تک، قهرمانلار

دیواریندان، داشلاریندان

توکولوبدی، سئل تک، قانلار

کوراوغلونون، نعره سیندن

قورخوب، قاچار، شاهلار، خانلار

خلق میزه، ایلهام وئریر

آدلی، سانلی، ستارخانلار

ایگیت اوغلون، حسین باغوان

آذربایجان، آذربایجان

آخشام چاغی، اوبالاردا

سرین سرین، یئل لر،اسر

گدیک لری، دوتوپ دومان

دره لرده، قوزی،مئلر

باغچالاردا، عاشق آلما

داغلاریندا، جیران، گزر

آلمالاری، آغاجلاردان

خمار گوزلی، قیزلار، د ره ر

هرطرفین، باغ دور، بستان

آذربایجان، آذربایجان

تاریخ لره، سالدیم نظر

وار سنده، مین لر،قهرمان

بابک لره، اولموش وطن

ستارخاننان، قالمیش نشان

داوا گونی، میدان لاردا

دوشمن لره، قارشی دوران

دوشمن، اگر ئولدورسه ده

ال چکمه رم، سندن، اینان

سن سن منه، روح وروان

آذربایجان، آذربایجان

                                                           شاعیر"حسن جداری"

                                  یاندیریب یاخماقدا اؤد قودرتی وار،
                                   تکجه من بیلیرم نه حیددتی وار،
                                  آخی، جزانین دا بیر مدتی وار،
                                  بوراخ گؤزلرینین حبسیندن منی.

قالدیم جاذیبه نده بیهوش کیمی یم،
مرحمت گؤزله ین باخیش کیمی یم،
قفسه سالینمیش بیر قوش کیمی یم،
بوراخ گؤزلرینین حبسیندن منی .

جئیران اولسام ، سن داغیمسان
بولبول اولسام ، سن باغیمسان
سونبول اولسام ، تورپاغیمسان
سرین سولار ، سند ن آخان
آنا یوردوم آذربایجان

آغ بولوتلار ، یور قانیندی
مرد اوغوللار  قوربانیندی
یول گورسدن ، قورآنیندی
دوشمن لری ، درده سالان
آنا یوردوم آذربایجان

من آرازام ، سن خزرسن
آغیزلاردا ، چوخ گزرسن
هر آفت دن ، بر حذر سن
قار-یاغیشلار ، سنه یاغان
آنا یوردوم  آذربایجان

قول-قانادیم ، هوسیم سن
یورولمایان ، نفسیم سن
من اوره یم ، قفسیم سن
منه دایاق ، کومک دوران
آنا یوردوم ، آذربایجان

من قوش اولسام ، سن پریم سن
زرگر اولسام ، سن زریم سن
عاشیق اولسام ، دیل بریم سن
عاشیق لری ، سای سیز اولان
آنا یوردوم  آذربایجان

گوزل لرین ، گوزلی سن
داد لی-دوزلو مزه لی سن
شاعیرین شعر ، غزلی سن
آدین سنین ، دیلده قالان
آنا یوردوم ، آذربایجان

                                             رامین دوستومدان تشکورلر

گؤرنه دوشوب نامردلره دونیامیز

کابوس اولوب تمام شیرین رویامیز

گنده چکیب نامرد الی دریامیز

باغدا داها نغمه چکمیر قناری

ظلمت دوتوب بوتون گوشه کناری

داغ دیبینده آغلاییرلار بولاغ لار

یانیر آمما ایشیق وئرمیر چراغ لار

ناله سسین ائشیتمه ییر قولاغ لار

خالقیم گئنه گئدیب شیرین یوخیا

فرصت وئریر دشمن تورون توخیا

کولک اسیر خالق اوره یین دوندوروب

اولان قالان امید اوتون سؤندوروب

بیرچک لره آرزی کولون قوندوروب

الله قویما ظلم ائوی آباد اولسون

ظلمت بیزیم اؤلکه میزه یار اولسون

دشمن دی بو دوست پالتاری گئییب دیر

اؤزون خالقا مشفق چوبان دئییب دیر

ایندیه جک مین لر قویون یئییب دیر

یئرتجی قورت واختی دیر کی یئخیلسون

یئر اوزونده بیر ائویم وار

پنجره سی گونشه

نغمه دئییب قوشلار قونار

پنجره مه همیشه

یئر اوزونده بیر ائویم وار

مین زحمت له قورموشام

اوردان ایکی کؤرپه قارتال

بویودوب اوچورموشام

یئر اوزونده بیر ائویم وار

اوجاقی دائیم یانار

اونون سؤنمز شعله سیندن

اورییم ایشیقلانار

یئر اوزونده بیر ائویم وار

خاطیره لر مسکنیم

ایلقاریندا دوز اولانا

آچیق دیر قاپیم منیم

یئر اوزونده بیر ائویم وار

اوردا نئچه ایللر دیر

طالعی بیر آرزوسی بیر

ایکی شاعیر عمر ائدیر

یئر اوزونده بیر ائویم وار

اوردا غمیم سئوینجیم

اوردان قدر ال چاتمایان

ایل لره عمور کؤچوم

یئر اوزونده بیر ائویم وار

سانکی خیالا دالمیش

او منیم ایچون ان مقدس

ایستی آشیان اولموش

یئر اوزونده بیر ائویم وار

باتماز طوفان لار اونا

بینؤره دن باغلی دیر او

بو وطن تورپاغینا ...

بو وطن تورپاغینا ...

دنیز اولاق دالغا اولاق داشمیاق

ایلان اولاق افعی اولاق ساژمیاق

مرد اولاق سوز دانیشاق قاشمیاق

شفای وصل قدرین ، هجردن بیمار اولاندان سور
زلال ذوق شوقون ، تشنه دیدار اولاندان سور

لبین سرین گلیب گفتاره ، من دن اؤزگه دن سورما
بو پنهان نکته نی بیر واقف اسرار اولاندان سور

گؤزو یاشلی لارین حالین ، نه بیلسین مردم غافل ؟
کواکب سرینی ، شب تا سحر بیدار اولاندان سور

خبرسیز اولما فتان گؤزلرین قیدین چکن لردن
خبرسیز مست لر بیدادینی ، هشیار اولاندان سور

غمین دن شمع تک یاندیم ، صبادان سورما احوالیم
بو احوالی شب هجران ، منیم له یار اولاندان سور

خراب جام عشقم ، نرگس مستین بیلیر حالیم
خرابات اهلینین احوالینی ، خمار اولاندان سور

محبت لذتین دن بی خبر دیر زاهد غافل
فضولی ، عشق ذوقون ، ذوق عشقی وار اولان دان سور

آخار چای لارین یولی اوسته داشلار اولماسایدی سویون سسی گوزل اولمازدی !

اوره ک ایستی اولسا سویوق قیش لاردا ایستی اولار ...

دولانارام باشینا

مارال قاچار داغ اوسته ، بولبول اوچار باغ اوسته

نیه مندن کوسورسن ، داغ چکیرسن داغ اوسته

گئتمه گئتمه مارالیم ، نه کی دردین وار آلیم

گؤزلرینه باخماسام ، گؤزلریمدن سالاریم

سئو کی سئون مرد اولار

سئومه ین نامرد اولار

بولبول ده گول باغیندا

بیرجه گوله بند اولار

سئوگیلینی قئناما ، اینانبرسان سئناما

دولانارام باشینا ، گلین اولسان آناما

سنه کونول باغلادیم ، چایلار کیمی چاغلادیم

من سنی بیر دویغو تک ، اوره گیمده ساخلادیم

قوشا خالین زیل قارا ، کیپریگینده میل قارا

اینانماسان عشقیمه ، آند ایچره م ایلقارا

                                                  سوز : عاریف

عزیزیم آپار منی

گول ائله آپار منی

ائل یولوندا ایتمیشم

ایتیرن تاپار منی

آجیخان چؤرک ایستر

قار توکن کورک ایستر

ظالیمین إوین ییخماق

بیر بؤیوک اوره گ ایستر

بوداغلار قار اولایدی

باهاری وار اولایدی

چوخدان گؤزوم یولدادی

اول گلن یار اولایدی

بوداغلاردان آشارام

سئل تک دولوب داشارام

وطنیمه یئتیشسم

ایللر بویو یاشارام

چتین گونده دوزه رم

دوستاقلاری چکه رم

وطنیمه یئتیشسم

توپراقینی اوپه رم

قارانلیقدان قاچارام

گؤنشه یول آچارام

وطن آدی گلنده

آدینا گول ساچارام

اوزان بیلر ساز نه دی

نازسیز بیلر ناز نه دی

باغبان آرزی سین چکر

بولبول بیلر یاز نه دی

عزیزیم آنا دیلیم

مین دئیه ر جانا دیلیم

زامان سیخیب بوغسادا

قویمارام یانا دیلیم

                                                                              قوشان : امیر نصیری ( ائلمان زنگانلی )

۲۰۰۸ موبارک اولسون

• آت آلماغا جاهیل گؤندر ، قیز آلماغا آهیل گؤندر
• آدام بیلمیر هانسی سازا اویناسین
• دوست ییخان ائوی فلک ده ییخابیلمز
• ائل آغزی ، چووال آغزی
• ائل اؤز دلی سین یاخشی تانیر
• اوشاق لا یولا چیخما ، ائششگی ییخیلسا آغلار ، ائششگین ییخیلسا گولر
• ایلانین آیاغین ، ملا نین چؤره گین گؤرن اولماییبدیر
• تازی نین آغاسی اولسا ، دووشانین تانریسی وار

     بیرنئچه هفته دیرکی آذربایجان تلویزیاسی گؤزل بیر پروگرام یاییر " موغام مسابقه سی " آدیندا . بو مسابقه ده کی باکی دا ، رشید بهبوداف آدینی داشیان ماهنی تئاتریندا کئچیر ، اشتراک ائدن لر آذربایجان موغامین و اونون شعبه لرینی ایفا ائدرکن ، منصف لر هیئتی واسطه سی ایلن ، ارزش لنیرلر .  هر هفته ، هفته نین ایکینجی و دؤردونجی گونونده افیره چیخان بو مسابقه ده ، منصف لر هیئتی طرفیندن ان آز خال توپلایان اشتراکچی مسابقه نی ترک ائدیر .

     بو مسابقه بوتون دونیادا ، خصوصیله تبریز و اردبیل ده بؤیوک بیر علاقه ایله قارشیلانیر . بو حرکت آذربایجان موغامینی همیشه دیری اولارکن بیر داها دیریلتدی . من بوردا بو پروگرامی یارادان لاردان  ، آذربایجان تلویزیاسی و حیدر علی اف فوندوندان بو گؤزل مسابقه نی یاراتماقدا اؤز تشکریمی بیلدیریرم .

گله جک ده یئنی فایل لار و شکیل لر له سیزینله اولمالیام .

 یاشاسین آذربایجان دیلی

                      آذربایجان یوردو

                            آذربایجان موسیقی سی ...

ساغدان : آقا خان عبداله اف ، عاریف بابایف ، علی بابا ممداف

علی بابا ممد اف ، منصف لر هیئتی نین عضوی

علم الدین ابراهیم اف ( اشتراکچی )

بیر گویرچین کیمی دنسیز له میشم
بولبولم ، یازدا چمنسیز له میشم
اسکی دن شانلی شرفلی ائل ایدیم
ظالیمه قارشی آمانسیز سئل ایدیم
ذیروه سی چنلی دومانلی بئل ایدیم
ایندی مدت دی کی چن سیز له میشم
دردیمین یوخ آدی عنوانی دئسم
حیرته دالدیرار انسانی دئسم
باشقا سوزلرله بو معنانی دئسم
اوز دیاریمدا وطنسیز له میشم
درد منی یاندیریر ،آمما آدی یوخ
دئییرم من بئله منسیز له میشم
ای منیم من لیگیم ، ایمدادیما یئت
بیرجه گل ،منله گوروش ، دادیما یئت
منی باس باغرینا ، فریادیما یئت
بیلمیسن کی نئجه سنسیز له میشم

ایستک لی دوستلاریمدان بیری ایندی سوئد مملکتینده یاشاییر . اؤزی تبریزده آنادان اولوب و ییرمی بئش ایل اوردا یاشاییب ، سونرا سوئده گئتمیشدیر . آذربایجانلی اولاراق ، درین دویغولو سئوگی سی واردیر آنادیلینه و آنا توپراقینا ! ایندی ییرمی ایله یاخین دیر کی غربت ده یاشاییر .  بیر نئچه گون بوندان قاباق ، بیر مکتوب آلدیم کی تبریزی بیرداها گؤرمک ایسته ییردی . مکتوبونو حزین حزین جمله لرله باشلاییب گؤزل شعرلر له سون قویموشدو . فیکیرله شیرم کی مکتوبون جاوابینی بئله باشلاییم :

   گوزل مکتوب دئنن هاردان گلیرسن

   اوره گیمده اولان دردی بیلیرسن

   آغلادیرسان گؤز یاشیمی سیلیرسن

   آه نه یامان آلوولانان کؤزون وار

   اولما ینه آنادیلده سؤزون وار

  یولون اوسته نئچه داغدان کئچمیسن

  اوراخ اولوب نئچه خرمن بیچمیسن

  نئچه بولاق گؤروب سویون ایچمیسن

  واللاه بیری آذر یوردونا چاتماز

  من بیلیره م دونیا باتسا ، او باتماز

   آذر ائلی وورغونی دیر داغلارین

   گوی بورونن کولگه سالان باغلارین

   آراز سویون مارال اؤپن چاغلارین

   آه نه گؤزل گول چیچکلی درؤن وار

   بیر سوروده آغون بوزون قرؤن وار

   سندن الهام آلیب ماهنی قوشانلار

   کول دیبیندن قالخیب قاچان دوشانلار

   کوراوغلی تک ظلمه ساری جوشانلار

   یوخدی هئچ نه گؤزلریمده تای سنه

   بوللی باخیب گؤنده ره رم پای سنه

گلمیشم اوتاقینا اویادام سنی

قاراگیله ، اویادام سنی

نه گؤزل خلق ائله ییب یارادان سنی

قاراگیله ، یارادان سنی

گؤتوروب من قاچارام آرادان سنی

قاراگیله ، آرادان سنی

بیل کی من سنی فیکیرله شیرم ...

قلبین یانسا بیرگون

بیل کی سن ایچون آغلاییرام ...

بیرگون ایچیندن آغلاماق گلسه

بیل کی من یاشامیرام ...

سنی اولدوزلارا بنزتیرم

اونلارکیمی پارلاق ...

اونلارکیمی معنالی ...

آمما بیرتک فرقینیز واردیر:

اونلار مین لرجه آمما سن بیردنه سن ...

هئچ بیلیردین هرکیمسه آللاهین گولوش لریدن بیری دیر ؟

سنی سویرم  کی آللاهین ان گؤزل گولوشی سن !

ائل شاعری " شهریار " ین کؤچوب گئتدیگی گونون ایل دؤنومی ایله باغلی ، آذربایجانین ایگیت شاعری " عاصم اردبیلی " نین شهریاریم عنوانلی شعری بوردا گتیریرم . من نه زامان اونو اوخودوم ، گؤزلریم دولدو . بو شعرده یاشایان دویغونو چوخدان دیر اؤزگه شعرده تاپا بیلمیرم . تقدیم ائدیرم اولو شاعریمیزین یادی ایله ...

شاعریم ، شهریاریم ، افتخاریم ، سئومه لی یاریم

آی منیم شان و وقاریم

گئتدین حیدر بابانین ذیروه سینی سیس دومان آلدی

باغری قان لاله لرین شاختا ووروب ، قار بوران آلدی

سنی بیزدن زامان آلدی

نه یامان گونده بو داغلی ائلین آرامینی آلدین

اؤزون آق کورکی گئییب ائل باشینا قاره نی سالدین

گؤیدن ایلهامینی آلدین

اولما " اولدوز سایاراق " انتظاری باشه یئتیردین

اولما سورگون یاشایان قارداشی قارداشه یئتیردین

اولمایا آیری دوشن قاره گؤزی قاشه یئتیردین

اللری باشه یئتیردین !

سن کی آذر ائلینی آتمازیدین ، نولدوکی آتدین ؟

سن کی " گؤزلر یاتاراق " یاتمازیدین ، بس نیه یاتدین ؟

سن کی یادلاره ائلین ساتمازیدین ، اولمایا ساتدین ؟

نییه اولدوز کیمی باتدین ؟

کیمی دوتدون ، بیزی آتدین ؟

کؤنلوموزده ینه قات قات یاتیشیب داغلار اوجالدی

دییه بیللم اوجالیقدا ساوالاندان دا باج آلدی

دن دوشوب ساچلارا زر تئللی گلین لر ده قوجالدی

نه بیلیم بلکه ده شیطان ینه دیرناغینی دیرناغینه چالدی

نفاقین بذرینی اکدی ،

هیجرانین طرحینی تؤکدی

بیر زامان حافظین عطرین ائلیمیز سندن آلاردی

زهره چنگ الده دوتوب صوبحه دک ایواندا قالاردی

سن اوخوردون او چالاردی ،

ظلماتین باغرینی یاردیقجا ، گؤیه سس اوجالاردی

عالمه لرزه سالاردی

طبعی نین ساغری داشدیقجا ، یئره اینجی جالاردی

شعری شعر اوسته قالاردی

بیر زامان سن ائلیمین نغمه قوشان بولبولو اولدون

بیر زامان یوردوموزون عطر ساچان سونبولو اولدون

گئتدین آذر ائلی نین بیر یارالی نیسگیلی اولدون

" حقه دوغرو نه قارانلیق ایسه ائل مشعلی اولدون "

دئدیگین حوری لره ایندی گئدیب سئوگیلی اولدون

ابدیت گولو اولدون

الی بوش گئتمه دین آنجاق ، ائلیمیزدن یاز آپاردین

سن ادب باغچاسی نین گول چیچکیندن ناز آپاردین

حوری لر بزمینه سؤزلو سینه ن ایچره ساز آپاردین

شوریله شهناز آپاردین ،

دئمیرم چوخ ، آز آپاردین ...

نئجه سن سیز یاشاسین ائل لرین اوغروندا جوشانلار

کیمدن ایلهامینی آلسین حایاتا نغمه قوشانلار

کلمه لر له دوتوشانلار

گئجه گوندوز چالیشانلار

چالیشارکن آلیشانلار

سن گئدن دن ، ادبیات باغی نین گول لری آغلار

ساری سونبول لری آغلار

اولکه میز یاسه باتاندان ، سونا بولبول لری آغلار

کوکره ییب قانلی آراز ، کور چایی نین سئل لری آغلار

عاشیقین گؤزلری آغلار

سازینین سؤزلری آغلار

موغانین دوزلری آغلار

اوتای آغلار ، بوتای آغلار

ماوی گؤی لرده آی آغلار ...

سنده دستانینی قوشدون او ایگید شانلی سهنده

باشی توفانلی سهنده

دوندو حیدربابانین قصه سی دستانلی سهنده

اوره یی قانلی سهنده

ده لی جیرانلی سهنده

یئنی دن داردا قالیب ، سانکی بیر اصلاندی ، باغیردی

داغلانار کن اوره یی داغلاری امداده چاغیردی

قوجا حیدربابامیز داغلاناراق ، اولدو دایاق سیز

اوبا سسدن دوشره ک ، قالدی اوره ک لرده قولاق سیز

ساری سونبول لرینی شاخدا ووروب بیچدی اوراق سیز

اود دوتوب یاندی اوجاق سیز ...

آرازین آیناسی کاسلاندی ینه غمله یاناشدی

دوشلریندن ساوالان میثلی سهندین سودو قاشدی

ینه غم لر قاطاری توزلو یاناقلاردا ایز آشدی

گؤزلرین کاسه سی داشدی

سئل اولوب باشلاری آشدی

قارا یئل اسدی خیالین آتی دوز یولدادا چاشدی

آمما حیدربابانین شهرتی دونیایا یاییلدی

شهریار باتدی سا ، یوخ عیبی ، یاتان گؤزلر آییلدی

ایل لر آی سیز یاشادی اؤلدوکی اولدوزلو ساییلدی

اوزو گئتدی آدی قالدی

آغزیمیزدا دادی قالدی

دئدی حیدربابایا ، دونیا یالان دونیادی آنجاق

شهریارداندا اثر قالسا ، قالار بیر آدی آنجاق

او آدی اولماز اونودسون وطنین اولادی آنجاق

باشینا آند ایچر ائل لر

اونا مسکن دی کونول لر

پایلایار عطرینی گول لر

آپارار هر یانا یئل لر

سسینه سس قوشو سئل لر

قیرا زنجیرینی اصلانلاریمیز قالمایا داردا

جوشا غیرت قانی بلکه بو سویوق قانلی داماردا

یاشایاق شانلی باهاردا

محو اولا شاخدادا قاردا

کاروانین باشچیلینی چالدی اجل چنگی آپاردی

او گئنیش روحونا دونیا قفسی بیلدی کی داردی

آخ نه توفان ، کی ادب باغچاسی نین ایچره قوپاردی

اوکی اولدوزلارا سوز اینجی سی مین غمزه ساتاردی

سوزه ن اولدوزلارا دوندو ، عومرونون مشعلی سوندو

او همان سلطان ایدی خدمته چکمیشدی صبانی

طی ائدن کون و مکانی

دوگه سلطان ریاضی قاپوسون صبح زامانی

تاپا علمین آتاسین سیرده اندیشه باغیندا

اونا مین نکته نی آیدینلادا ان خسته چاغیندا

دییه ، دشمن گتیریب دیر اله فرضیه نی اوستاد

آتمین بومبی ائدیر عالم انسانلیغی برباد

اوز نبوغونله اوره ک لر ائوینی ائتمه سین آباد

جنگین عفریتی چکر کامینه انسانلاری بیر گون

بویایار آل قانا دونیانی آخان قانلاری بیر گون

او همان باغبان ایدی ، گول لری ایستردی تیکان سیز

دده قورقود کیمی داغلار باشین ایستردی دومان سیز

او همان گوهر ایدی عالم امکان دا مکان سیز

جانلی ایستردی اووی ، اووچونو جان سیز

یوردون ایستردی خزان سیز

او همان قارتال ایدی کهلیگی سالمازدی نفسدن

اوخیان بولبول ایدی باد خزان سالمادی سسدن

باغیران اصلان ایدی ، واهمه ائتمزدی قفسدن

قوجامان شاعریدی ، شعرین آییرمیشدی هوس دن

سوزونه عشقی واریدی

اؤزو آلاهه ساریدی

شانلی حیدربابانین تورک ائلینه یاز نوباری ایدی

دادلی – دوزلو غزلی ، کوتله لرین شام ناهاری ایدی

سوزو دوزگون عیار ایدی

گئجه لر صوبحه کیمین همدمی توزلو سه تاری ایدی

تاری عمری ایله یاری ایدی

" عاصمین " ده باشی نین کؤلگه سالان شهریاری ایدی

آمما افسوس بویاز شهریارین سون باهاری ایدی

اولدوز ساياراق گؤزله ميشم هر گئجه ياري

گئج گلمه ده دير يار يئنه اولموش گئجه ياري

گؤزلر آسيلي يوخ نه قارالتي نه ده بير سس

باتميش قولاغيم گؤر نه دؤشورمكده دي داري

بير قوش ‹آييغام› سؤيله يه رك گاهدان اييلده ر

گاهدان اونو دا يئل دئيه لاي لاي هوش آپاري

ياتميش هامي بير آللاه اوياقدي داها بير من

مندن آشاغي كيمسه يوخ اوندان دا يوخاري

قورخوم بودو يار گلمه يه بيردن ياريلا صبح

باغريم ياريلير صبحوم آچيلما سني تاري !

دان اولدوزو ايستر چيخا گؤز يالواري چيخما

او چيخماسادا اولدوزومون يوخدو چيخاري

گلمز تانيرام بختيمي ايندي آغارار صبح

قاش بئيله آغارديقجا داها باش دا آغاري

عشقين كي قراريندا وفا اولماياجاقميش

بيلمم كي طبيعت نيه قويموش بو قراري

سانكي خوروزون سون باني خنجردي سوخولدو

سينه مده اورك وارسا كسيب قيردي داماري

ريشخندله قيرجاندي سحر سؤيله دي دورما

جان قورخوسو وار هركيم اوتوزموش بو قوماري

اولدوم قارا گون آيريلالي او ساري تئلدن

بونجا قارا گونلردي ائدن رنگيمي ساري

گؤز ياشلاري هر يئردن آخارسا مني توشلار

دريايه باخار بللي دير چايلارين آخاري

از بس مني يارپاق كيمي هجرانلا سارالديب

باخسان اوزونه سانكي قيزيل گولدو قيزاري

محراب شفقده اؤزومو سجده ده گؤردوم

قان ايچره غميم يوخ اوزوم اولسون سنه ساري

عشقي وار ايدي شهريارين گوللو چيچكلي

افسوس قارا يئل اسدي خزان اولدو باهاري

بو شعری " سارای " درگی سیندن کی اردبیل ده چاپ اولونور گتیرمیشم . یازانی لطفعلی فیکرت بیله سوار دان گوندرمیش دیر .

اوره گیم باغلی بیر قارا تئل ده دیر

بئله بیر گوزل لیک بیزیم ائل ده دیر

سازلی دیر سؤزلی دیر مین عاشیقلی دیر

کؤنول گؤزل لره دولاشیقلی دیر

هنر بو دیارا یاراشیقلی دیر

بئله بیر گؤزل لیک بیزیم ائل ده دیر

بوتون گرامه لی دیر اوباسی ائلی

زامان دفترینده آغاران تئلی

منه وارلیق اولان آنامین دیلی

بئله بیر گؤزل لیک بیزیم ائل ده دیر

بوتون اوره ک لرده قالیب بو عنوان

دییب وطن اوغلو بو سؤزی هر آن

نه گؤزل یاراشار موغانا جیران

بئله بیر گؤزل لیک بیزیم ائل ده دیر

قیشلاقی وار اوباسی وار بو ائلین

سای سیز ایگیت بالاسی وار بو ائلین

خان چوبانی ساراسی وار بو ائلین

بئله بیر گؤزل لیک بیزیم ائل ده دیر

سهنگی چیگنینده نازیلان هله

گلیر بولاق اوستن یار گوله گوله

مین اوره ک باغلانیب قارا بیر تئله

بئله بیر گؤزل لیک بیزیم ائل ده دیر

چیچک لر قول بویون اولوب ساللانیر

باخدیقجا دونیادان بشر ذوق آلیر

اوتوروب بیر یاندا چوبان نی چالیر

بئله بیر گؤزل لیک بیزیم ائل ده دیر

آلاچیق هم کؤمه بیر ویقار بیزه

آران یایلاغی میز اعتیبار بیزه

مینیب آت بئلینده گلیب یار بیزه

بئله بیر گؤزل لیک بیزیم ائل ده دیر

حاق سلامی هم چوره گی دوزو وار

یاشماقلار آلتیندا مین اولدوزو وار

حیالی عصمتلی گلین قیزی وار

بئله بیر گؤزل لیک بیزیم ائل ده دیر

بوداغ لار دؤشونده گئچمیشیمیز وار

عشقین سینه سینده اؤروشوموز وار

ساوالان لا هئله گوروشوموز وار

بئله بیر گؤزل لیک بیزیم ائل ده دیر

لاله لر تک باغریم ائوی داغلی دیر

دوگون دوگون عشقیم سیزه باغلی دیر

فیکرت ده بو ائلین هنر اوغلو دیر

بئله بیر گؤزل لیک بیزیم ائل ده دیر

آذربایجان مارالی

(موسی میرزه اف)

آی قیز گزمه آرالی

کونلوم سندن یارالی

گؤزلرینه حیرانام

آذربایجان مارالی

سن بولاغ اوسته گزنده

قیقاجی باخیب گولنده

آلدین صبری قراریمی

آذربایجان مارالی

من قوربانام گؤزلره

شیرین شیرین سؤزلره

بیر قوناق گل بیزلره

آذربایجان مارالی

او گونه قوربان کسره م

گلمه سن سندن کوسه رم

گزه رم سندن آرالی

آذربایجان مارالی

گئدک قیرخ قیز یایلاقینا

مارال جیران اوولاقینا

ائنک عیسی بولاغینا

آذربایجان مارالی

ترش سو اولسون یایلاقیمیز

گؤزل شوشا اوولاغیمیز

سن اولایدین قوناغیمیز

آذربایجان مارالی

بو شعری قاراباغلی" حسن میزه " یازمیشدیر . قاراباغ دا و گؤیچه ده باش وئرن محاربه چوخلارین دیدرگین سالیب و اؤز ائلیندن اوباسیندان آییریب دیر . بو شعر ده شاعیر گئچمیش گونلرین یادا سالاراق ، اؤز دوغما دیارین اوخشاییر و گؤزل تشبیه لردن ایشلدیر . گون او گون اولسون آذربایجانیمیزین بو حیصه سی ده اؤز مطلق آزادلیغینی اله گتیرسین ... یاشاسین گؤزل آذربایجان !

اوشاقلیغیم ، ان خوش چاغیم

سنده گئچیب سنده داغلار

اتگینده باغچا باغین

قالیب مندن گئن ده داغلار ...

هانی او اوغوز ائل لری

نه دن سولوب دیر گول لری

نیه لال اولوب دیر دیل لری

سوسما دیل لن سنده داغلار ...

یوردومدا ائلین گؤرونمور

اوجاق لارین یانیب سونمور

یان توتک ین سسی گلمیر

دؤز بو درده سن ده داغلار ...

گؤیچه گؤل دن دومان ائنه

گؤی تپه دن چن سورونه

یاغیشدان سونرا گؤرونه

گؤی قورشاغی سنده داغلار ...

قوزی قولاغی دوزنان اووام

قار آلتیندان یارپوز ییغام

دوست تانیش نان مجلس قورام

یاتام قالام سنده داغلار ...

سما اوجا ائنن میرم

قوجاغینا گلن میرم

سنی قویوب گئدنمیرم

روحوم قالیر سنده داغلار ...

لاله لر اؤرپک شالین دیر

چیچک لر خالچا خالین دیر

" حسن میرزه " قوناغین دیر

ده قالسین می سنده داغلار ... ؟

بو شعرین سسلی فایلینی بوردان یوکله یین !

منیم چوخ سئودیگیم آذربایجان ماهنی لاریندان بیری " آذربایجان مارالی " ماهنی سی دیر . اینانمیرام بیری آذربایجانلی اولاراق اونو ائشیتمه میش اولسون . آنجاق بو لینک دن یوکله یه بیلرسیز :

آذربایجان مارالی

اردبیل ین گوزل شاعیرلریندن بیری " عاصم " آدلی بیر دویغولو و درین معنالی یازیچی دیر . اونون بحر طویل یازماقدا قدرت لی قلمی واردیر . جهنمده بیتن گول آدیندا بحر طویل اینانیلماز بیر داستانی کی اردبیل شهرینده باش وئریب وصف ایله ییر . سیزدن ایستردیم کی اونو دقت له اوخویوب فیکیر لشه سیز .

فلکین قانلی الیندن بیر آتیلمیش یئره اندی ، بیرفلاکت آنانین جان شیره سیندن سودون امدی ، بوللو نیسگیل شله سین چیگنینه آلدی ، تای توشوندان دالی قالدی ، ساری گؤل مثلی سارالدی ، گونی تک باغری قارالدی ، درد الیندن زارا گلدی ، گونی گوندن قارا گلدی ، خان چوبان سیز سئله تاپشیرسین اؤزون یوردوموزا بیر سارا گلدی ، بیر وفاسیز یار الیندن سانا گلمز یارا گلدی ، بیر یازیق قیز جان الیندن جانا گلمز جانا گلدی ، کئچه جکده " الموت " دامنه سیندن بورایا درمانا گلدی ، بیر آدام سیز سوری آدلی ، الی باغلی ، دیلی باغلی ...

سوری کیم دیر ؟ سوری بیر گول دی جهنمده بیتیبدیر ، سوری بیر دامجی دی گؤزدن آخاراق اوزده ایتیب دیر ، سوری یول یولچو سو دیر ، اگری ده یوخ ، دوزده ایتیب دیر ، سوری بیر مرثیه دیر اوخشایاراق سؤزده ایتیب دیر ، او کؤنول لرده کی ایتمیشدیر ازل دن ، اودی گؤزدن ده ایتیب دیر ، سوری بیر گؤزلری باغلی ، اؤزی داغلی ، سؤزو داغلی ، اولوب هاردان هارا باغلی ...

بوشلاییب دوغما دیارین اوموب البته یاریندان ، ال اوزوب هرنه واریندان ، قورخماییب شهریمیزین قیشدا آمانسیز بورانیندان نه قاریندان ، گزیر آواره تاپا یاندیریجی دردینه چاره تاپا بیلمیر ، چوخ سئویر عشقی باشیندان آتا آمما آتا بیلمیر ، اووا باخ اووچی دالیجا قاچیر آمما چاتا بیلمیر ، ایشه باخ لیلی دوشوب چوللره مجنون سراغیندا ، شیرین الده تئشه داغ پارچالاییر فرهاد اوتورموش اتاغیندا ، تشنه لب قو نئجه گؤر جان وئری دریا قیراغیندا ، گؤزده حسرت یئرینی خوشلاییب ابهام دوداغیندا ، وارلیغین سون اثری آز قالیر ایتسین یاناغیندا ، سانکی بیر کؤزدی بورونموش کوله کورلیق اوجاغیندا ، بوی آتیر رنج باغیندا ، قوجالیر گنج چاغیندا ، بیر آدامسیز سوری آدلی ، الی باغلی ، دیلی باغلی ...

سوری جان ! اومما فلکدن فلکین یوخدی وفاسی ، نه قدر یوخدی وفاسی او قدر چوخدی جفاسی ، کهنه رقاصه کیمی هر کسه بیر جوردیر اداسی ، او آیاق دان دوشه نی ایستیر آیاق دان سالان اولسون ، او تالانمیشلاری ایستیر گونی گوندن تالان اولسون ، او آتیلمیش لاری ایستیر هامی دان چوخ آتان اولسون ، او ساتیلمیش لاری ایستیر قول ائدرکن ساتان اولسون ، نیله مک قورقی بوجوردور ، فلکین نظمی ازلدن اولوب اضدادیله باغلی ، قره سیز آغ لار اولانماز ، دره سیز داغلار اولانماز ، اولو سیز ساغ لار اولانماز ، گره ک هر بیر گؤزله بیرد نه چیرکین ده یارانسین ، بیری انسین یئره گوگدن ، بیری عرشه اوجالانسین ، بیری چالسین ال آیاق غم دنیزینده بیری ساحلده سئوینج ایله دایانسین ، بیری ذلت پالازین باشه چکیب یاتسادا آنجاق ، بیرینین بختی اویانسین ، بیری قویلانسادا نعمت لره نینک ، بیری ده قانه بویانسین ، آی آدامسیز سوری آدلی ، ساچلاریندان دارا باغلی ... !

نیله مک ایش بئله گلمیش ، چور گلنده گوله گلمیش ، فلکین اگری کمانیندا اولان اوخ آتیلاندا دوزه دگمیش ، دیلسیزین باغرینی دلمیش ، اگری قالمیش دوزی اگمیش ... اونا خوشدور بو فلک ائل ساراسین سئل لر آپارسین ، خسروی شیرین ایله ال اله وئرسین ، فرهادین قامتین اگسین ، باخاراق چرخ زمان نشئیه گلسین ، کئفه دولسون ، سورو لار سولسادا سولسون ، بیری باش یولسادا یولسون ، سیسقا بیر اولدوز اگر اولماسا اولدوزلار ایچینده بو سما ظلمته باتماز ، داش آتان کول باشی قویموش داشینی اؤزگه یه آتماز ، سن یئتیشسون هدفه اوندا فلک مقصده چاتماز ، داخی افسانه یاراتماز ، سوری آی باشی بلالی ، زمانین قانلی غزالی ...

سوری بیر قوشدو خزان آیری سالیب دیر یوواسیندان ، ال اوزوبدور آتاسیندان ، جوجه دور حیف اولا سود گؤرمیوب اصلا آناسیندان ، او زلیخا کیمی یوسف ایین آلمیر لباسیندان ، بونا قانع دی تنفس ائلییر یار هاواسیندان ، درد وئرن درده سالیب آمما خبر یوخ داواسیندان ، آغلاییب سیتقایاراق بهره آپارمیر دعاسیندان ، او بیر آئینه دیر رسام چکیب اوستونه زنگار ، اوندا یوخ قدرت گفتار ، اؤزو چیرکین دیلی بیمار ، گنج وقتینده دل آزار ، گؤره سن کیمدی خطاکار ، گؤره سن کیمدی جفاکار ...

عالیم قاسیم اوف 1957 نجی ایلده آنادان اولوب . والدین لری اونون موسیقی یه و خصوص ایله موغاما قارشی اولان استعدادینی اوشاق لیقدان بیلیب لر آنجاق اونا موسیقی تحصیلی آلماقا امکان لاری یوخ ایدی . ال لرینده تکجه بیر شئی گلمیشدیر ، دف دوزلتمک ایچون آتاسی بیر کئچی کسمیشدیر . بو دف عالیم ین بیرینجی موسیقی آلتی اولموشدور و بونونلا بیرلیکده او گؤزل و فرق لنن سسه صاحب ایدی .

   داها سونرا او باکیدا موغام مکتبینین  ان تانینمیش و استعدادلی معلم لریندن درس آلمیشدیر . 25 یاشیندا عالیم ، حیاتیندا بیرینجی موغام مسابقه سینده موفقیت قازانمیش دیر . او واختلاردا او ، موغام صنعتینین خصوصیله ده " طرب " ژانری نین آراشدیرما لاریلا مشغول اولوردو .

   1989 نجی ایلده ، عالیم قاسیم اوف ، منصوراوف قارداشلاری ایله  " تارزن ملک " و کمانچا چالان " ائلشن " ایله چئخئش ایله مگه باشلامیشدیر .

   موغام صنعتی نی فرانسا ، انگلیس ، آلمانیا ، بلژیک ، اسپانیا ، برزیل ، ایران و آمریکا کیمی اؤلکه لرده کنسرت لرله چئخیش ائدن صنعت چی ، بوتون دنیایا آذربایجان موغام صنعتی نی تانیندیراراق ، آذربایجان مدنیتی نین دنیایا یاییلماسی ایچون بؤیوک بیر رل اویناییر .