X
تبلیغات
آذرماهنی - شعرلر


گل آچ اوره ييني دينله ييم سني

دنيز تك چكيليب قابارير سينه ن

ديلين ديه بيلمير قلبين ديه ني

آز قالير آليشان گؤزلرين دينه ...

 

باخيشين كدرلي، اوزون اوتانجاق

بلكه ده قوورولور سؤز اوره يينده

من اوني بيليره م حايات دا آنجاق

سيرلي بير دونيا وار قيز اوره يينده ...

 

ياناقين قيزاريب سسين تيتره يير

دوروب كيپريگينده داملا داملا ياش

تورپاغا زيلله نن باخيشين ديير

تزه جه سئويرسن سن ياواش ياواش ...

 

بيلميرسن حيس كئچر هوس اوتري

دييرسن خوشبخت دير كيمين ياري وار

گوره رسن، سئويليب سئونده ن بري


عؤمرون، اه، نه قدر عذاب لاري وار ...

یازان رافیق  | ثابیت لینک |




بیریمیز قیش اولدوق، بیریميز باهار

سانکی بیلینمیردی، بیزده سئوگی وار

سؤندو اوره گيمده  شیرین آرزولار

سنی باغیشلایا بیلمیرم  آرتیق ...


سویویوب باخیشین، سویویوب قلبین

الیمه دگمه‌سین او سویوق الین

حسرتین چکدیردین منه ایل لرین

سني باغيشلايا بيلميرم آرتيق ...

 

یازان رافیق  | ثابیت لینک |



حوسنون گوزه ل آیت لری، ای سئوگی‌لی جانان

اولموش بوتون عالم ده سنین شانینه شایان

گل ائیله عينايت، منه وئر بوسه لبیندن

چونکی گوزه لین بوسه سی‌ دیر عاشيقه احسان

سوردوم کی کونول هاردا‌دیر آلدیم بو جاوابی

هئچ سورما، تاپیلماز اونو آختارسا دا اینسان

رحم ائیله دئییب، سئل کیمی گوز یاشیمی توکدوم

کیم، قانیم ایله ال یوما، اي آفت دووران

اینصافین اگر وارسا، آچیق ده، بو نظامی

سن له نئجه رفتار ائله سين، اي مه تابان؟



یازان رافیق  | ثابیت لینک |

داغلار منه گل- گل دئسه اورک ‌دن

گلیب، ائله بو یئرلرده قالاردیم

طبیعتله سئوینجیمی، دردیمی

بؤلوب، ائله بو یئرلرده قالاردیم

 

نفسیمده یاشاداردیم عطرینی

عزيزلردیم چیچک‌لرین خطرینی

عؤمرون- گونون قیمتینی، قدرینی

بیلیب، ائله بو یئرلرده قالاردیم

 

نه گؤزه ل دیر بو داغلارین تالاسی

من گئتسم ده، کؤنلوم بوردا قالاسی

سئوسه منی بیر ظالمین بالاسی

اؤلوب، ائله بو یئرلرده قالاردیم

 

یازان رافیق  | ثابیت لینک |

سنی سئومک ... 92/04/24 12:55

          ائله بیلیرسن آسان دی؟

          چیخیب گئتمک …

          بو شهرین

          هر کونجون‌دن

          اوشاقلیغیم سیزیلدایان

          خاطيره‌لری

          سؤکوب گئتمک ...

 

          ائله بیلیرسن آسان دی

          سنی سئومک …

          بو شهرین یاغیشینی

          باشقا شهرین

          باهارینا دییشیب

          پاییزی‌نین رنگ‌لرینه

          اوز چئویرمک ...

 

          یاغیشی‌نین جیزیلتی‌سینی

          کولیی‌نین ویییلتی‌سینی

          قولاقلاریمدان‌ سؤکمک

          کدری‌نین بوز رنگيني

          دنیزی‌نین ماوی‌سینی

          یارپاغی‌نین ساری‌سینی

          گؤزلرین‌ده کی ظولمته باتیریب

          چیخیب گئتمک ...

 

          ائله بیلیرسن آسان دی

          ال لری‌نین ایستی‌سینی

          گؤزلری‌نین قورخوسونو

          دوداق‌لاری‌نین پیچیلتی‌سینی

          گؤتوروب گئتمک …

 

          ائله بیلیرسن آسان دی؟

          سنی سئومک ...

 

یازان رافیق  | ثابیت لینک |

   یئنه اوزاق یول‌لاردا گؤرونمز اولدون سن

      حیاتدا ایتیرمیشم ایزینی،

         سنی یالنیز خیال‌لاریمدا تاپیرام

            یئنه گؤی اوزونو بورويوب دومان

               یئنه داغ‌لار آرخاندا گؤرونمز اولدو ...

                  بیلیرسن، سنی هاوایا بنزه دیرم

                     گاه توتولوب، گاه آچیلیرسان

                        ایستییرم گؤی گورولداسین

                           شیمشک چاخسین

                              دومان یوخ اولسون

                                 اوزومه چیلنسین دامجی‌لاری

                                    من آخی یاغیشی چوخ سئویرم ...

 

یازان رافیق  | ثابیت لینک |

          اورییم ین کدر آدلی یوکو وار

              قوشالاشیب بیر آزینی چکن یوخ

                  قیسمتیمه غم گئن اولدو، سئوینج دار

                      غم یولونو منله بیرجه کئچن یوخ ...

 

یازان رافیق  | ثابیت لینک |

          تنها بیر اوتاقدا تک قالا‌جاقسان،

              پنجره اؤنونده دایانا‌جاقسان،

                  من گلن یول‌لارا بويلانا‌جاقسان،

                      آرتیق بو دونیادا من اولمایاندا ...

 

یازان رافیق  | ثابیت لینک |

musa yaqub

 

یارپاق اولوب تورپاغینا تؤکولسم،

تورپاق اولوب سئل‌لرین له سؤکولسم،

سئل- سئل اولوب دریا‌لارا تؤکولسم،

دویماز گؤزوم، دویماز یئنه بو ائلدن.

 

قایا کیمی شیمشک‌لره دؤزوم مو ؟

شیمشک اولسام، آز عؤموردن بئزیم می ؟

عؤمور کئچیب،  کئچیب اگسه دیزیمی

دویماز گؤزوم، دویماز یئنه بو ائلدن.

 

ساحيل اولوب دالغا‌لارلا اوولسام،

دالغا اولوب کولک‌لرله قوولسام.

کولک اولوب سما‌لارا سورولسام،

دویماز گؤزوم، دویماز یئنه بو ائلدن.

 

چئشمه کیمی دامجی- دامجی سوزولسم،

دامجیلانیب چیچک‌لره دوزولسم،

چیچک اولوب واخت‌لی، واخت‌سیز اوزولسم،

دویماز گؤزوم، دویماز یئنه بو ائلدن.

 

یازان رافیق  | ثابیت لینک |

یالان دونیا ( دییشمه )

( بو دییشمه نین شعیرلری یازی نین آردیندا دیر . )


یازی نین آردی
یازان رافیق  | ثابیت لینک |

یاغیش .... 90/09/27 8:46
 
 
دونن آخشام چاغی سن‌سیز منی آغلاتدی یاغیش

یادیما سالدی سنی مطلبینه چاتدی یاغیش

کوچه‌ لر اولدو گؤزومده یئنه بیر آرپا چایی

منی سن‌سیز نئجه نیسگیل سئلینه آتدی یاغیش

اودو سؤندورمه گه سو قایداسی‌دیر آمما دونن

کؤزه ره ن کؤنلومو یاغدیقجا آلوولاتدی یاغیش

دامجی دامجی سنه لای لای دئدی قوینومدا منیم

نه دئیم بلکه سنی کورپه یه اوخشاتدی یاغیش

او قدر مستیدیم هئچ بیلمدیم آخیر نه زامان

سینه م اوسته ساریلان تئل‌لری ایسلاتدی یاغیش

سورا بیلدیم آپاریب قورد کئچینین شنگولوسون

سنی مندن آلیب آنجاق منی آلداتدی یاغیش

یازان رافیق  | ثابیت لینک |

سن گئتدین ... 90/04/30 10:54

سن گئتدین ائله بیل دونیا داغيلدی

یاز دا کؤچوب گئتدی ، یئری بوش قالدی

باهار اوره ییمی سن‌سیز قيش آلدی

من یازا وورغونام ، قيشي نئیليره م ؟؟؟

 

عشقيمي آپاریب سن گئتدین دئمک

عشق سيز بیر کؤنول نه ییمه گره ک ؟

سویوق داشا دؤندو او گونده ن اوره ک

سینه م دن آسیلان داشي نئیليره م ؟؟؟

 

هميشه آیریلیق، گئجه - گوندوزوک

بیریمیز تپه ییک بیریمیز دوزوک

اوستونون قاشی لا تانینار اوزوک

اوزویوم یوخدورسا ، قاشي نئیليره م ؟؟؟

 

نیه یاشاییرام من نیيه سن ‌سیز

نه یئره باخمارام ، نه گؤيه سن ‌سیز

من کی کور اولموشام هر شئيه سن ‌سیز

کور گؤزون اوستونده قاشي نئیليره م ...

یازان رافیق  | ثابیت لینک |

 

اوره ییم اینجه‌لر یاغیش یاغاندا

یادیما دوغما‌لار ، عزیزلر گله ر

نده ن سه گئجه‌لر یاغیش یاغاندا

یوخوما دریا‌لار ، دنیزلر گله ر

 

گئجه یاغیش یاغار ، مین سس، مین صدا

تیکان‌لی نغمه‌لر دینله یه ر گئجه

اینه‌لر سانجیلان ، اینه‌لر باتان

زنجي بدنی تک اینله یه ر گئجه

 

گئجه یاغیش یاغار ، غم له کؤک‌له نن

بیر شاعير قلبینی عزيز له مک ايچون

گئجه یاغیش یاغار ، گوندوز چیرک‌له نن

گوناهکار دونیانی تمیزله مک ايچون

 

سما صاحیبکاری کؤوره‌لر یئنه

آچار ساندیق‌لاری ، دفینه‌لری،

گئجه یاغیش یاغار ، یاغار شعریمه

یووار هئجا‌لاری ، قافیه‌لری

 

گؤزلریم یورولوب یورغون آی کیمی

سؤندوروب ایشیغی یاتاجاغام من

ایندی اوتاغیمی کلاغای کیمی

گئجه‌نین چینینه آتاجاغام من

 

ایندی اوتاغیما دولا‌جاق گئجه

گئجه نی یانیمدا قالا‌جاق گئجه

سحر آچیلاندا منیم ائویم‌دن

قوپ قورو چیخا‌جاق بیر اوتاق گئجه...

یازان رافیق  | ثابیت لینک |

əjdər ol

بوردا باكي دا ياشايان آذربايجانلي گنج شاعير " اژدر اول " دان ايكي شعر وطن حاققيندا ، mp3 فورماسيندا ، سيزين ايچون حاضيرلاميشام .  

آذربايجان

وطن ...

یازان رافیق  | ثابیت لینک |

من سنی اونودا بیلمیره م، آخی

اونوتسام نه لری اونودام گره ک ؟

گؤی‌لره باخمیشیق آی لی گئجه‌ده

اونوتسام گؤی‌لری اونودام گره ک !

 

دنیزی اونودوم، یا دالغا‌لاری

خاطيره ن یادیم‌دان چیخایدی باری

پاییزدا خزانی ، قیشدا سا قاری

باهاردا گول‌لری اونودام گره ک !

 

دئ نئجه اونودوم من سنی نئجه؟

سئوگی دورنا دییل پاییزدا کؤچه !

یوخوما گلیرسن منیم هر گئجه

آیلاری، ایل لری اونودام گره ک !

 

سنین خیالین‌دیر حسرتله باخان

آدین‌دیر هر ساعات قارشیما چیخان

قاریشیب شکلینه گؤزوم‌ده ن آخان

یاغیشی، سئل‌لری اونودام گره ک !

 

سینه مده پئشمان اوره ییم قالدی

اوچدون اللریمده لئليیم قالدی

نه لری ایتیریب ، باخ نه ییم قالدی

نه لری، نه لری اونودام گره ک !

یازان رافیق  | ثابیت لینک |

بیر آخشام طرفی

 گونش باتارکن

  بیر گلین‌لیک دونو

   کیرایه گؤتوره ک ...

    بیر شوشه لیکؤر،

      بیر قوتو سیقار …

        و بیر قدر زامان

          گئده ک

            صحرا‌لارین بیتن یئرینه …

دنیزین

 دادینا باخاق،

  قوم‌لارا بورونک،

   اولمازمی؟...

    من سنین اولوم،

      دونیاسا منیم …


…نیشان اوزوگي

   ایسته میرم،

    بارماغیمی

      دیشله‌سن یئتر …


یازان رافیق  | ثابیت لینک |

   دوداقیم دا ...

      ماهنی چیچك له نیر ...

         ساواش میدانین ‌دان

            غنيمت له قایيدان بیر عسگر تك

               سئوینجلی ام ...

                  ساچلارین ‌دان بیر نئچه تئل

                     فاتح اولموش بیر قوشون تک 

                        بارماقلاریم آراسیندا اینتیظار چكیر ....

یازان رافیق  | ثابیت لینک |

زليم خان يعقوب او

زلیم خان یعقوب اف

 

ناحاق ائنديك او داغلارين باشيندان

گره ك اوردا قال اوغلي قال اولايديق

عؤمروموزو گؤل عؤمرونه دؤندريب

زيروه ده قار ، پتك ده بال اولايديق

 

آللاها تن ، حاققا ياردي زيروه لر

يارانيش دان دوم آق قاردي زيروه لر

عؤمروموزو اوجالداردي زيروه لر

ناحاق ائنديك او داغلارين باشيندان

 

اوفوق لرده قوش اولماق دا گؤزه ل دير

شيمشك لره توش اولماق دا گؤزه ل دير

لاپ او يئرده داش اولماق دا گؤزه ل دير

ناحاق ائنديك او داغلارين باشيندان

 

حاق ائوي دير هر داش اوتاق هر كاها

سالام وئرير دان يئرينه ، صاباحا

تئزه تئزه قووشوردوق آللاها

ناحاق ائنديك او داغلارين باشيندان

 

یازان رافیق  | ثابیت لینک |

mp3 شعرلر 90/03/23 12:57

قشم ميرزه اوغلي نجف اف 1959 اينجي ايل آپرل آييندا " ايميشلي " رايونوندا آنادان اولوب . 1981 اينجي ايلده يونيورسيته دن ادبيات شعبه سيني بيتيريب .  حال حاضيردا آذربايجان يازيچي لار بيرليگي نين " آذربايجان " ژورناليندا شعر شعبه سي نين موديري و " تفككور " يونيورسيته سينده  باش معلم دير . آشاغي د ا كي لينك لردن اونون اوز ديليتده اوخونان شعرلريندن دانلود ائده بيلرسينيز .

ائشیت عزیزیم ...

بيلدين مي ؟ ...

مني آلدادايدين ...

یازان رافیق  | ثابیت لینک |

گلوبدور تنگه ای ظالم ، ستمله قان اولان کؤنلوم

همیشه باغ وصلینده ، گولوب خندان اولان کؤنلوم

دوشوب مجنون کیمی ، صحرایه بیر لیلی فراقیندا

بوتون عاشقلر ایچره ، منبع عرفان اولان کؤنلوم

نه اولدو بیلمه دیم دوشدو ، جدا گولزار کویوندان

همیشه خوان وصلین بزمینه ، مهمان اولان کؤنلوم

کیمه بیلمم ، گئدیب اظهار قیلسین محنت عشقین

دؤنوبدور قانه هيجرینده غمی پنهان اولان کؤنلوم

نه چاره ائیله سین ، بیلمم خلاص ائتسین اؤزون غمدن

اسیر محنت و پا بسته هيجران اولان کؤنلوم

اولورمی بیر زمان خرم ، یئتیشسه وصل جانانه

غم هجرینله افغانلار چکیب ، گریان اولان کؤنلوم

منم فرهاد ! عصرین سئودیگی واحيد  گوزل لر دیر

اودور کی لاله داغین گؤستریر ، ویران اولان کؤنلوم

 ****

زولفونده نه لازیم ، گؤزلیم ، شانه دولانسین ؟

قویما او حرمخانه نی بیگانه دولانسین

عیب ایله مه ، کویوندا دولانسام گئجه گوندوز

شمعین گرک اطرافینه پروانه دولانسین

ساقی دولانیم باشینا مئی جامینی گزدیر

سرمست اولوم ، باشیما میخانه دولانسین

اول زولفه کؤنول وئرمه ، دییرلر منه ال چک

اونسوز نئجه بس بو دل دیوانه دولانسین

مجنون نه برابر منه صحرالره قاچدی

عشق اهلی اودور عرصه ده مردانه دولانسین

اغیار ایله اؤز یارینی همدم گؤرن عاشیق

دوشسون او گره ک دشت و بیابانه دولانسین

سرخوش لیق ایله عؤمرونی صرف ائیله مه  واحید

عارف اونا دییرلر کی ، حکیمانه دولانسین

 

یازان رافیق  | ثابیت لینک |

قيسا شعرلر 90/02/12 13:5

Sevginin yalnız
dadına baxa bildim.
Yemək istədim
Ayrılıqla doyuzdurdular...

سئوگي نين يالنيز

دادينا باخا بيلديم .

يئمك ايسته ديم

آیريليق لا دويوردو لار ...

Tək ürəyim yox!
Gözlərim gözlərin üçün,
əllərim əllərin üçün,
qulağım səsin üçün
darıxır...

تك اوره گيم يوخ !

گؤزلريم گؤزلرين ايچون ،

ال لريم ال لرين ايچون ،

قولاغيم سسين ايچون

داريخير ...

 

یازان رافیق  | ثابیت لینک |

مهستی گنجوی نین رباعی لری کیتابی نی pdf فورماسیندا و لاتین الفبا ایله یازیلمیش صورت ده آشاغی دا کی لینک دن آلا بیلرسیز .

مهستی گنجوی نین رباعی لری

یازان رافیق  | ثابیت لینک |

باخدیم دالیسیجا یار گئدنده
بیر یولدا دئدیم باخار گئدنده
باخدی قاپیدان کئچنده گولدو
بیلمیردی اوره ک اومار گئدنده
باغلاندی دیلیم اوره کده ن آمما
آز قالدی چئکم هاوار گئدنده
گئتمه گئدیسن ؟ یاواش – یاواش گئت
جانیم بیلی سن چیخار گئدنده
دؤندر گؤزونو خومار – خومار باخ
قویما منی ده ، خومار گئدنده
سن سیزلیگه دوزمه گیم چتیندی
گل جانیمی آل قوتار گئدنده
سندن سورا عشقی نئیلیرم من
آل عشقینی ده آپار گئدنده
مهر ائیله نوازش ائیله بلکه
گول بیتسین اورک ده قان گئدنده
من گؤر نه دئییردیم اؤز اؤزومنه ن
قول بوینوما بیر سالار گئدنده
بیچاره اوره ک بولود کیمین دیر
گؤردوکجه سنی دولار گئدنده
دای « جعفری » بسدی سیزلاما چوخ
سؤز اوستادی شهریار گئدنده
ایراندا هونر دیلنچی لیک دیر
باخما کی تاپار ویقار گئدنده

 

یازان رافیق  | ثابیت لینک |

مهستی گنجوی 90/01/28 11:19

اون بيرينجي عصرين سونلاري و اون ايكي اينجي عصرين اول لرينده ياشاميش بويوك آذربايجان شاعره سي مهستي گنجوي آذربايجانين پارلاق صنعتكار و مغني سي دير .  مهستي هر صنعت ده بيرينجي ليك قازانميش دير . او ايلك مشهور آذربايجان شاعره سي ، ايلك شاهمات چي قادين ، ايلك گوركملي قادين موسيقي چي سي و چوخ احتمال كي ايلك قادين بسته كاريميز دير . روايت لره اساسا او گنجه نين "خرابات" محله سينده ياشاميش ، واختيني قوناق ليق لاردا موسيقي و رقص مجلس لرينده كئچيرميش دير . اونون شعرلرينده شراب و عشق دويغوسو ترنم اولونور .

شاعره نين اثرلري ايچره سينده گنجه نين خرابات محله سينده ياشايان گنج صنعتكارلارا ، درزي لره ، اييريجي لره ، قيزيل آختاران لارا و باشقالارينا حصر ائتديگي شعرلر سلسله سي داها چوخ مشهور دور :

 

دون كاشي كوزه مي داشلارا چاخديم

سرخوش ديم بيلمه ديم اليمدن سالديم

كوزه ديله گليب دئدي كي من ده

سنين كيمي ايديم ، بو گونه قالديم

بنزه ر، درزي اوغلو ، اوزون قمره

سنه يوز مهستي دونر چاكره

الينده كي ساپ تك يولوم دوشه كاش

شكر دوداقينا گونده مين كره

يون اييره ن اوغلان منيم جانيم دير

اونون زنخداني بير زيندانيم دير

اونون دوداقيندان بوسه وئر الله

چونكي او دوداق لار جان درماني دير

تورپاق اليين ين من عاشيقي ام

ديليم گلمير آچيپ سيرريمي دييم

او تورپاق ال له ييب قيزيل آختارير

من اليمده قيزيل اوني گزيره م

پاپاق چي سئوگيليم شوق ايله بياق

تيكيردي الينده اطلس ده ن پاپاق

هر پاپاقا يوز يوز آفرين دئديم

دوردونه بيري ده بس ايدي آنجاق

 

آذربايجان ادبياتي نين قدرت لي نماينده سي اولان مهستي گنجوي نين رباعي لري ، خاقاني و نيظامي اثرلري ايله باغلي اولماق لا ، دنيوي حس لر ترنم ائدير ، اينساني و اونون گوزه ل ليگيني ، آرزو و ايستك لريني ايفاده ائدير :

 

بير نال گوتوروب گلدي او نال بند اوغلان

نال وورماق اوچون اگيلدي قالديم حيران

كيم گؤردي بوجور معجزه ني عالم ده

وورسون هلال آت ديرناغينا بدر اوغلان !

                     * * * *

هرگاه كي گؤزومده ن ياشيم الوان توكولور

آغلار منه گوي ، ياشي بير عمان توكولور

سنده ن گؤزوم آيريلديغي گون قان توكدي

آيريلسا بدن دن باش اگر ، قان توكولر

                     * * * *

 شهلا گؤزون اي گؤزه ل باخسا مستانه

سرخوش دا گلر ، مي ده گلر افغانه

رقص ايله سه ساچلارين سنين بير لحظه

مين فتنه قوپار ، كونول گلر طغيانه

 

یازان رافیق  | ثابیت لینک |

یئنه گلدی باهار عطیرلی ، لاله لی غمزه لی نازلی نیگار

گئچدی عوموردن شاختا سازاقلی ، قارلی کولک لی ، غملی کدر لی گونلو قیشلار

بیر داها قارلی داغلار چیخاراجاق آغ کورکونو 

 گئیه جک یاشیل دونونو

 تاخاجاق دوشونه آل لاله لری 

توحفه وئرجک قوجاق قوجاق ... اتک اتک

مین بیر رنگ ایله بویانمیش لچک چیچک

بیر داها آخاجاق شلاله لر دامجی دامجی ، اینجه اینجه

نوروز گولو  قار چیچگی بویلاناجاق توپراقدان دویمه دویمه

بوز بولاقلار ارییب آخاجاق طبیعت یاناغیندا

سوزه جک جان تاپاجاق بولاق اوتو

گوله جک یاماجلاردا بوینو بوکوک بنو وشه لر

گونش ساری تئلرینی یایاجاق سینه سینه داغلارین

چیچک  قوناجاق آیلمیش بوداغلارینا آغاجلارین ، باغلارین

گوللر عطیر ساچاجاق دره لره ، داغلارا

باد صبا شانه چکر تئللره

خبر وئرر  اوبالارا - ائللره

نه یاتمیسیز دورون شادلیق ائدین فرح گلیب دیللره

بولبول اوخور سئوینج گلیر گوللره

قارلی قیشا سون دی  باهار

داغا یاشیل دوندی باهار

گولوش دی سانکی ، دوداقلارا قوندی باهار

سئوگیه باشلانیش حسرته سون دی باهار

 غملر آتار سئوینج قاتار

دورنالاری قاتار قاتار

چیچک لری لئچک لئچک

سئل سولاری آشار داشار

یئل اولوب داغدان اشار


یازان رافیق  | ثابیت لینک |

باهار گلدی ... 90/01/13 22:47

عطیر لرین قوجاغیندا ناز باهار

اوردوسونو گتیریب دیر بویانا

خوش قوخولو نوروز گولو ، بنووشه

لاله نرگیز یاییر  آذربایجانا



باهارین خوش نسیمیندن بو گون روحلاندی سونبول لر

دونوب بیر جنته یوردوم آچیلدی جور به جور گول لر

بوتون گولشن لره ای دل نیگهبان اولدو بولبول لر

یاشیل چول لر صفالاندی چیچک گولدو چمن گولدو


یازان رافیق  | ثابیت لینک |

باهار گلیر ... 87/12/15 11:27
 

کپنک لر گولدن گوله قونورلار
باهار گلیر پنجره نی باغلاما
بنوشه لر کردیمیزه دولورلار
بولاغ آخیر سن گؤزه لیم آغلاما

یئنه قالدی اوزو قارالیق کؤموره
ظالیم شاختا ساراییندا گول بیتیر
ایلیق یئللر اسیر سئزاق یئرینده
یاز چمنده آچیب چیچکدن چتیر

گول دردیمیز بوزا دؤنوب اریسین
خزان وورموش آرزی باغی گول آچسین
یاز گتیرسین یئنیلیک ین نغمه سین
کؤنول لرده اومود دالی زوغ آتسین

گول اوچوشسون دوداق دوداق دردیمیز
سئوگی سئلی سارسین عومور یوللارین
کؤلگه لرده سارالماسین گولوموز
اسیر تورپاق دادین آلسین باهارین

یازان رافیق  | ثابیت لینک |

شاعیر میرزا علی معجز شبستری تبریزین شمال شرقینده واقع اولان شبستر شهرینین اهلی دیر . او 1252 شمسی ایلینده آنادان اولوب و حاجی آغا آدلی بیر تاجیرین اوغلی دیر . میرزا علی تحصیلاتین بیر کؤهنه اصول مکتبینده مشغول اولموش و اؤز یازدیغینا گوره آتاسی اونون 16 یاشیندا اولان زامان وفات ائدیب و قارداشلاری اونی استانبولا دعوت ائتمیشدیلر . معجز استانبولدا چوخ حکایت و ادبیات و تاریخ صاحه سینده یازیلان رمان لارین اوخوماقی ایله مشغول اولموشدیر . معجز 30 یاشا چاتاندا غربتی ترک ائدیب و اؤز وطنی شبستره مراجعت ائتمیشدیر و ان عزیز اوقاتینی شیخ محمود شبسترلی نین توپراغی کناریندا کئچیریب و شعر یازماغا مشغول اولموشدیر .

اثرلریندن واضح گورونور کی شاعیر اجتماعی حیات باره سینده بؤیوک و گؤرکملی آددیملار گوتوروب . مثلا دئیر کی :

چون قاییتدیم وطنه آچما دهانین دئدیلر

دینمه دانیشما و ترپتمه زبانین دئدیلر

دئدیم اللاهه باخین ائتمه یین  آخر اولدوم

گر بوجور ائتمیه سن چوخدی زیانین دئدیلر

شاعیر اوز زندگانلیغیندا بئله یازیر :

"وطنه قایداندان سونرا یوردومون حالینی گؤروب نوحه خوانلیغا باشلادیم ! منیم نوحه خوانلیغیم آخوندلارین خوشونا گلمه دی و منه محاربه اعلانی ائتدیلر . 26 ایل ووروشدوم . خیرات وئردیلر منی دعوت ائتمه دیلر ، طوی اولدی منی چاغیرمادیلار ، یعنی یازدیم و گوشه کناردا باشا آپاردیم ."

او اؤز شعرلرینده خرافات اصول لاری و جهالت و ظلالته سوق ائدن عادت و مرض لری تنقید ائدوب ، اینسانلاری یاخشی شرح لر و گؤزل شعرلر وسیله سی ایله مدنیت و اجتماعی حقوق سمتینه سوق ائدیب و هئچ بیر زاددان قورخوسی یوخموش .

شعرلریندن نمونه لر عزیز اوخوجولاریما تقدیم اولونور ...


یازی نین آردی
یازان رافیق  | ثابیت لینک |

 

اوستاد شهریار

يیغدی خير و بركت سفره سين ، احسانیله گئتدی
امن امانليق دا يوكون باغلادی ، ايمانیله گئتدی

بيگ خان اولمازسا دئيه رديك اولاجاق كنديميز آباد
او خراب كتده ، و لاكن ائله بيگ خانیله گئتدی

(سيلو) داير اولالی ، هر نه دگيرمان ييغيشيلدی
آمما خالص تميز اوونلاردا ، دگيرمانیله گئتدی

مستبد سلطاني سالدوق ، كي اولا خلقميز آزاد
سونرا باخديق كي آزادليق دا او سلطانيله گئتدی

بير (بلی قوربان!) اولوب ايندی بيزه مين بلی قوربان
آمما (خلعت وئرن) اول بير بلی قوربانیله گئتدی

دوز مسلمانه ديئيرديك : قولاغی توكلو دی بدبخت
ايندی باخ ، گور كی او دوزلوك ده ، مسلمانیله گئتدی

وئرمه (صابر) دئدی ، او دولما فسنجانی آخوندا
آغزيميزدان دا داد ، اول دولما  فسنجانیله گئتدی

دئدی انسانيمیز آزدير ، هامي انسان گرك اولسون
آمما انسانليقمزدا ، او آز انسانیله گئتدی

بو قدر (دفتر) و (اسناد) له ، بير حقه چاتان يوخ
حق وئرنلر (پيتيگي) ميرزا قلمدانیله گئتدی

بيزه بير دين قالا بيلميشدي ميراث ، بيرده بو ايران
دين گئدنده دئدی : " تك گئتمه رم! " ايرانیله گئتدی

ايسته ديك قانلا يوواق ئولكه ميزين لكه سين ، آمما
ئولكه ميز خالص ئوزی لكه اولوب قانیله گئتدی

يورقانی اوغری قاپاندا ، دئدی ملانصرالدين :
نيله سين چيلپاغيدی ، اوغري دا يورقانیله گئتدی

هاوا انسانی بوغور باش باشا " گاز كربنيك " اولموش
يئل ده اسمير ، ائله بير ، يئل ده سليمانیله گئتدی

سو ، كرج دن " كلور " ايله گلی پاسلی دميرده
گوره سن " شاه سويی " تك چشمه نه عنوانیله گئتدی

تركی اولموش قدغن ، ديوانيميزدان دا خبر يوخ
"شهريارين" ديلی ده وای دئيه ، ديوانیله گئتدی

 

یازان رافیق  | ثابیت لینک |

هر زامانکی باخیرام باشینا قار وار گورورم                   

اوغول اولموش آتا تک گوزلرین آغلار گورورم

هر طرفدن چکیلیب سینه وه داغلار گورورم                 

آی آلان اوستونو غم چیسگینی ، هر یانی دومان

آی یاغان باشینا غملر اودو ، یاسلی ساوالان


گورموشوک یازدا کوچک لرده چیچکلر آچیلار                  

هر طرفدن چیمنین سینه سینه گول ساچیلار

ماهنی لار قوشماغا باشلار یئنه ده قوشماچیلار          

یاز گلیب گئتدی یئنه گولمه دین اوچ آیدا بیر آن

آی یاغان باشینا غملر اودو ، یاسلی ساوالان


قرنیلر گئچدی سنین گولمه دی بیر لحظه اوزون         

قانلی یاش توکدو سارالمیش اوزونه یاشلی گوزون

غصه دن دوندو قارانلیق گئجه اولدو گونوزون               

نه سوران حالینی اولدی نه وئرن جیسمیوه جان

آی یاغان باشینا غملر اودو ، یاسلی ساوالان


آند وئررم سنی او قانه بلنمیش داشووا                       

گئجه گوندوز او گوزوندن توکولن قان باشووا

اورگین دردینی بیلدیر او "سهند" قارداشووا                  

سنی وارلیق  سنی تانری  سنی بو آه و فغان

آی یاغان باشینا غملر اودو ، یاسلی ساوالان


سالارام یادیما بیر لحظه او گئچمیش لریوی               

توکولن سنگ جفائیله او دور دیشلریوی

ایزلرم بیر بیر او حئیرت یارادان ایشلریوی                    

هامی دان من سنین احوالینا آرتیق نیگران

آی یاغان باشینا غملر اودو ، یاسلی ساوالان


ساکیت اول ، آغلاما قوی بیرجه چکیلسین بو دومان      

گون چیخیب ظولمنی بیر یوللوقا قووسون بورادان

"نبی" گلسین ، بو آت اولسون یئنه داغلار آتیلان          

"هجر"ین بلکه یغیلسین گوزو یولدان ، آناجان

آی یاغان باشینا غملر اودو ، یاسلی ساوالان


سوندوره بیلمه دی گوز یاشین اورکدن اودووی              

چاغیریم قوی کومک ائتسین سنه اوز اولادیوی

افتخاریله بوگون ذیکر ائدرم پاک آدیوی                         

مرد اوغوللار بئجریب خلقه وئرن شوهرت و شان

آی یاغان باشینا غملر اودو ، یاسلی ساوالان


"بابکین"گئتدی سه بوش قالمادی آمما قوجاغین             

دولودور مین ائله اوغلانلاریلا هر بوجاغین

نه قدر یئل اسه طوفان قوپا سونمز اوجاقین                    

ای بلالر سپری ، خالقا یامان گونده آمان

آی یاغان باشینا غملر اودو ، یاسلی ساوالان


چنلی بئلده "ده لی لر " قوی یئنه قورسون بوساطی         

قوچ کوراغلو یئنه جولانه گتیرسین قیر آتی

هئچ زامان اصلین ایتیرمز او کی دوزگوندی ذاتی             

آند اولا آدیوا ، آی گوزلری آغلار ، یاشی قان

آی یاغان باشینا غملر اودو ، یاسلی ساوالان


سن دویوشلرده بیر آسلان کیمی دوردون ایاغا                

اوخ آتیلدیقجا بیزه سینه نی وئردین قاباغا

غم یئمکدن داها جانیم یئتیشیب دیر دوداغا                   

نه یامان گونلره گور قالدی بو احساسلی بالان

آی یاغان باشینا غملر اودو ، یاسلی ساوالان


بابالاردان بیزه قالمیش بو مثل هاممی بیلر                   

سو ٬ گلن آرخا دئیبلر یئنه بیر گون سو گلر

فلکین داش اورگین آه اوخو آخیردا دَئلر                         

"بارز" اوغلوندا یئتر سئودیگی یاره او زامان

آی یاغان باشینا غملر اودو ، یاسلی ساوالان


یازان رافیق  | ثابیت لینک |

 بیرجه ایچیملیک سو ، بیر اووج تورپاق
بیر چینار کؤلگه سی ، بس ائدر منه
بیر لطیف بنؤوشه ، بیر یاشیل یارپاق
حزین بیر نئی سسی بس ائدر منه
...
بیر سونبول دنه سی ، بیر آیدین سما
بیتمز بیر خاطرات بس ائدر منه
بیر حسرتسیز عمور ، بیر سونسوز وفا
بیر عمورلوک حیات بس ائدر منه
...
بیر کؤرپه گولوشو ، بیر توی صداسی
بیر دوست صداقتی بس ائدر منه
بیر قارانقوش سسی ، بیر یاز هاواسی
بیرده ائل شفقتی بس ائدر منه
...
یازان رافیق  | ثابیت لینک |

سارا بیر آیدی بیزیم ائللره، آیسیز گئجه لر

بیر اوجا سسدی قولاق وئر اونا هایسیز گئجه لر

سارا بیر باغدی طبیعتدن آلیب قول بوداقی

بیر شیرین ماهنیدی یانلیز اوخویار ائل دوداقی

سارا بیر قیزدی سودان سورمه چکیب گؤزلرینه

جان دئییب بیرده اورکدن آرازین سؤزلرینه

سارا سئودا ایله دونیانی آتان بیر قیزدی

سارا غملر اوجاقینادا آلیشان بیر کؤزدی

بیر نجابتلی گلین دیر ائله آسلان سایاغی

قویمادی تار ائده دونیاسینی چاققال آیاقی

اؤزونو آتدی سئله اؤزگه نی حئیران ائله دی

او یانان شمعینی پروانه یه قربان ائله دی

قوشولوب سئللره گئتدی آنا یوردون ساراسی

قالدی شیرین اوره گینده یئنه فرهاد یاراسی

باغلادی ساچلارینی قویمادی بیگانه گؤره

آنا یوردون قیزی وئرمز ساچین هر کیمسه هؤره

گلین اولدو آرازا، اوردا تویون توتدو سارا

سؤیله دی اوردا اورک سؤزلرینی نازلی یارا

آراز آغلار گؤز ایله، آلدی سارا اللرینی

دارادی ائل قیزینین بیرده قارا تئللرینی

گئتدی گؤزلردن اوزاق دوشدو ائلین بیردنه سی

گؤرمه دی خان چوبانین آیریلیقین سون نفسی

سارا گؤزلردن اوزاق دوشسه ده ایتمز اثری

بیر یاراق تک سؤزونون واردی هله چوخ کسری

یازان رافیق  | ثابیت لینک |

ایکیمیزده بیر اورک وار

                     یاری منده ، یاری سنده

سئوگی آدلی بیر آغاجیق

                     بوداق منده ، باری سنده



چیچک بیتر گول اوزونده

مین معنا وار هر سوزونده

بیر بولودوق گوی اوزونده

                    یاغیش منده، دولی سنده




بیراووچویام گوزوم اوودا

قاچ ها قاچدا ، قوو ها قوودا

عومروموز بیر شیرین سئودا

                   پتک منده ، بالی سنده

یازان رافیق  | ثابیت لینک |

ساوالان...

اوچور ایلهامیم او قوشلار کیمی کی
یاز وعده سینده
قوزانیر ماوی گویه تا اوجا باش بیر داغا قونسون
کورپه قارتال کیمی دیر
گاه چکیلیر گوزده ن ایتینجه ک
اگله نیر گاه ساوالان عشقینه _آغدان_آغا قونسون
هر اوجا داغ کی گوروسن باشی قاردا آغاراندی
اورا بیل کی ساوالاندی
آمما یوخ!
هر اوجا داغ سسیمی آلسا دا تئز قیته ره جکدی
سسی قیته رمک همان یئل بیله جکدی
آخی یئل یولچو دو گئتگین اوکی سوز ساخلایا بیلمز
یئل سوزو قاپدی قاچیردار اونو کیم هاخلایا بیلمز
یئل گئدر گیندی پیچیللار سوزو کوللار قولاغیندا
سوزو قربان ائله یر قیرنادا قانقال آیاغیندا
چئویره ر سوز چاناغیندا
جالایار داغلارا هر بیر سوزو مین سوز توره دندی
بیلمیرم سیرری ندندی
یئل گئده ر گیندی یئلی ساخلاماق اولماز
یئله بئل باغلاماق اولماز
آمما سن ای سوزو سینه نده کوزردن ساوالانیم
کیم گله صدقله زرتشت بئجردن ساوالانیم
ائلیمین شانلی داغی باباشیوا مین لر جه دولانیم
اریدیب ائل غمی بیر یول سنی کوکدن ده تالانسان
سئل اولوب قانلی دنیزلر کیمی دونیایه جالانسان
آدی دیللرده قالانسان
ساوالانسان،ساوالانسان
ساوالان ائل غمینی بللی دی ساخلار سینه سینده
سینه سی کوزدو آلودور گیزیلیک اینسی سی واردیر نفسینده
شاعرین غملی سه سینده آلگیلان ساخلا سن ای ائل داغی غملی قفسینده
ساوالان آلسادا هر سیرری سوزو داغلارا سالماز
گوره نامرد دوروبدور ساوالاندان سس اوجالماز
ساوالاندا توکولن داشلاری دیندیر دانیشالار
سالسا عاشیق نفسین کوللارا،کوللار آلیشالار
ده ده قورقود سازی چالسا
ده لی دومرول باش اوجالدار
بلی البته کی یولداش باشینی یولداش اوجالدار
سسله عاشیق سازی چالسین
سسی میز بیرده اوجالسین
اویناماق لیزگی یه دونسون
کاس شوشم گوزگویه دونسون
قوی وئرک سس سسه باهم اوخویاق بیرده کوراوغلو دلی سیندن
هجرین قوچ نبی سیندن
اوکی ظالیملری مظلوملارین اوستونده ازه ردی
او کی آسلان کیمی داغلاردا یاتیب باغدا گزه ردی
اوخو عاشیق اوخو
سن بیل اوکی تانری تانییبسان
سوزومه دوز جالییبسان
سوگوم قوی سازا گلسین
بولبولوم آوازا گلسین
یازمیشام ایوازا گلسین
گوج آلاق قوی دلی لردن
باج آلاق اجنبی لردن
اوکی بیلمیر نبی کیمدیر قویون آذر ائلینی مسخره سانسین
بیر عومور دورکی فضولی نی -نسیمی نی دانیب ایندی ده دانسین
شهریار تک سن اوجات باشیوی قوی عرشه دایانسین
قوی باخار کور تر ایچینده جوموبان اولسون -اوتانسین
اوکی آخساخدی یوبانسین
اوکی تورکون دیلین اسگیتمه گه تصویره سالیبدیر
اوکی تورکون بالاسین ایندی ده آشغالچی سانیبدیر
او تفاله بیلیرم فیکرینی طاغوتدان آلیبدیر!!
او رژیمیندی قالیبدیر
یوخسا تورکون بالاسیندان چیخیب علامه ی دوران
اونا دونیا باش اییر فلسفه ده
بیرجه نه ایران
قوی دئییم شهریاریمدان
نیسگیل او چرچی یه قالسین کی جواهیر نه دی، قانمیر!!
فیکری آللاتما دادیر خالقی ،ائلین حالینه یانمیر
اریمیر،اولمور،اوتانمیر
آخی ای قاردا،دوماندا باش اوجالدان ساوالانیم
غمی ،دونیانی قوجالدان ساوالانیم
ائل بیلیر داغلار آرا هر اوجا داغلار باشی سن سن
وئر سهنده الیوی قارداشیوین سیر داشی سن سن
وئر گیلن بیر لیک الین بیرده دماونده اونون یولداشی سن سن
اوندان آیریلما آماندی
یولوموز چندی دوماندی
قوی ایگیدلر سیزه فخر ائلیه ییبن باشین اوجاتسین
قویما قارتال دولانان یئرلره قوزغون الی چاتسین
ساوالان چنلی چاغیندا
منیم ایلهامیم اولارکن
کونلوم اوز سری سوزون صدق ایله سویلر ساوالانه
ساوالان کوز قالادار شاعیر اولانلار سینه سینده
اوردا زرتشت گئدیب تانریدان ایلهامین آلانه
اگیرم باش ساوالانه، اگیرم باش ساوالانه
یازان رافیق  | ثابیت لینک |

قــیزیل گونش گوی اوزونده گـولنده،

نغمه سینی قوشلار باغ- باغ بـولنده،

من گوز آچـــیب، بو دونـــــیایا گلنده،

بخت اولدوزوم بورادا یانان اولوبدور

ایلک بئشیگیم آذربایــجان اولــوبدور
بو شعرین آردی وار ....

یازی نین آردی
یازان رافیق  | ثابیت لینک |

87/06/10 11:54
یارین بویون قوجاقلادیم یارآغلادی من آغلادیم
ییغیشدی قونشولار بوتون جار آغلادی من آغلادیم

باشیندا قارقالان داغا دانیشدیم آیرلیق سوزون
بیر آه چئکیب باشینداکی قار آغلادی من آغلادیم

طاریمدا نار آغاجلاری منی گوروب دانیشدیلار
بویومو زیتون اوخشادی نار آغلادی من آغلادیم

ائلئی که اسدی بیر خزان تالاندی گوللیرم منیم
خبر چاتینجا بولبوله خار آغلادی من آغلادیم

اورک سوزون دئدیم تارا سیملر اولدی پارا پارا
یاواش یاواش سیزیلدادی تار آغلادی من آغلادیم

دئدیم کی حق منیم کی دیر باشیمی چکدیلر دارا
طناب کسنده بوینومو دار آغلادی من آغلادیم
یازان رافیق  | ثابیت لینک |

یوبانمیشام 87/06/10 8:55
دولدور پیاله نی وئر ایچیم، چوخ یوبانمیشام

ایللر بویو بو جامیدن اوتری دولانمیشام

گورجک سنی ، تمام وجودوم سن اولموسان

سنسیز ولی ، اوزومده اوزومدن تالانمیشام

سنلی گونش لریم منی ایزلیر آداخلی تک

نئیلیم من عاشقم ، سنی تکجه اینانمیشام

عشقیم یالان دئییل منه بیگانه سویله مه

مجنون کیمی دالینجا گزیب چوخ دولانمیشام

سنسن منیم ازل سوزومون سون حکایتی

سن ناز ائله ، کی من سوزوم اوسته دایانمیشام

عالم بیلیر کی اوزگه خیالی باشیمدا یوخ

عشقیم بو دور کی عشقین ایچون چیرمالانمیشام

من وار یوخو اودوزسام اگر سنلی گونلره

یوخدور غمیم کی سنله حیاتی قازانمیشام

قوی باشیوا اوزوم دولانیم مین نیازیله

یاندیر یانیم کی یانماق ایچون گر یارانمیشام

بیر گون گلر دئیر کی « سامع » ده گئتدی گل

گئتماق گرک ، قالماغا واخت یوخ ، یوبانمیشام

 

                                                                           عزیز دوستوم ایل قیزیندان تشکورلر

یازان رافیق  | ثابیت لینک |

هاچان، بیرده، گورم سنی

آنا یوردوم، آنا وطن

گول اوزووه، حسرت قالیب

سن سیز، گلدیم جانا، وطن

مین داوادا، مین دویوشده

بولاشمیسان قانا، وطن

کیم دور سنه، ایری باخا؟

کیم دور، سنی دانا، وطن؟

جانیم اولسون، سنه قربان

آذربایجان، آذربایجان

   

 


بسله میسن قوجاغیندا

حیدرخان تک، قهرمانلار

دیواریندان، داشلاریندان

توکولوبدی، سئل تک، قانلار

کوراوغلونون، نعره سیندن

قورخوب، قاچار، شاهلار، خانلار

خلق میزه، ایلهام وئریر

آدلی، سانلی، ستارخانلار

ایگیت اوغلون، حسین باغوان

آذربایجان، آذربایجان

 



آخشام چاغی، اوبالاردا

سرین سرین، یئل لر،اسر

گدیک لری، دوتوپ دومان

دره لرده، قوزی،مئلر

باغچالاردا، عاشق آلما

داغلاریندا، جیران، گزر

آلمالاری، آغاجلاردان

خمار گوزلی، قیزلار، د ره ر

هرطرفین، باغ دور، بستان

آذربایجان، آذربایجان



تاریخ لره، سالدیم نظر

وار سنده، مین لر،قهرمان

بابک لره، اولموش وطن

ستارخاننان، قالمیش نشان

داوا گونی، میدان لاردا

دوشمن لره، قارشی دوران

دوشمن، اگر ئولدورسه ده

ال چکمه رم، سندن، اینان

سن سن منه، روح وروان

آذربایجان، آذربایجان

                                                           شاعیر"حسن جداری"

یازان رافیق  | ثابیت لینک |

گوزلرین ... 87/04/23 17:59
چکیر وارلیغیمی دارا گؤزلرین،
آپاریر روحومو هارا گؤزلرین،
قارا بیر محبس دیر قارا گؤزلرین،
بوراخ گؤزلرینین حبسیندن منی.


                                  یاندیریب یاخماقدا اؤد قودرتی وار،
                                   تکجه من بیلیرم نه حیددتی وار،
                                  آخی، جزانین دا بیر مدتی وار،
                                  بوراخ گؤزلرینین حبسیندن منی.


قالدیم جاذیبه نده بیهوش کیمی یم،
مرحمت گؤزله ین باخیش کیمی یم،
قفسه سالینمیش بیر قوش کیمی یم،
بوراخ گؤزلرینین حبسیندن منی .

یازان رافیق  | ثابیت لینک |

بیر اوشاغام، آنام سن سن
خسته اولسام، داوام سن سن
آغاج اولسام، هاوام سن سن
اورک ائویم سنسیز تالان
آنا یوردوم، آذربایجان


جئیران اولسام ، سن داغیمسان
بولبول اولسام ، سن باغیمسان
سونبول اولسام ، تورپاغیمسان
سرین سولار ، سند ن آخان
آنا یوردوم آذربایجان


آغ بولوتلار ، یور قانیندی
مرد اوغوللار  قوربانیندی
یول گورسدن ، قورآنیندی
دوشمن لری ، درده سالان
آنا یوردوم آذربایجان


من آرازام ، سن خزرسن
آغیزلاردا ، چوخ گزرسن
هر آفت دن ، بر حذر سن
قار-یاغیشلار ، سنه یاغان
آنا یوردوم  آذربایجان


قول-قانادیم ، هوسیم سن
یورولمایان ، نفسیم سن
من اوره یم ، قفسیم سن
منه دایاق ، کومک دوران
آنا یوردوم ، آذربایجان


من قوش اولسام ، سن پریم سن
زرگر اولسام ، سن زریم سن
عاشیق اولسام ، دیل بریم سن
عاشیق لری ، سای سیز اولان
آنا یوردوم  آذربایجان


گوزل لرین ، گوزلی سن
داد لی-دوزلو مزه لی سن
شاعیرین شعر ، غزلی سن
آدین سنین ، دیلده قالان
آنا یوردوم ، آذربایجان

                                             رامین دوستومدان تشکورلر

یازان رافیق  | ثابیت لینک |

... 87/02/29 10:17

گؤرنه دوشوب نامردلره دونیامیز

کابوس اولوب تمام شیرین رویامیز

گنده چکیب نامرد الی دریامیز

باغدا داها نغمه چکمیر قناری

ظلمت دوتوب بوتون گوشه کناری

 

داغ دیبینده آغلاییرلار بولاغ لار

یانیر آمما ایشیق وئرمیر چراغ لار

ناله سسین ائشیتمه ییر قولاغ لار

خالقیم گئنه گئدیب شیرین یوخیا

فرصت وئریر دشمن تورون توخیا

 

کولک اسیر خالق اوره یین دوندوروب

اولان قالان امید اوتون سؤندوروب

بیرچک لره آرزی کولون قوندوروب

الله قویما ظلم ائوی آباد اولسون

ظلمت بیزیم اؤلکه میزه یار اولسون

 

دشمن دی بو دوست پالتاری گئییب دیر

اؤزون خالقا مشفق چوبان دئییب دیر

ایندیه جک مین لر قویون یئییب دیر

یئرتجی قورت واختی دیر کی یئخیلسون

آصلان لارین الی آلتدا سئخیلسون
یازان رافیق  | ثابیت لینک |

یئر اوزونده بیر ائویم وار

پنجره سی گونشه

نغمه دئییب قوشلار قونار

پنجره مه همیشه

 

 

یئر اوزونده بیر ائویم وار

مین زحمت له قورموشام

اوردان ایکی کؤرپه قارتال

بویودوب اوچورموشام

 

یئر اوزونده بیر ائویم وار

اوجاقی دائیم یانار

اونون سؤنمز شعله سیندن

اورییم ایشیقلانار

 

یئر اوزونده بیر ائویم وار

خاطیره لر مسکنیم

ایلقاریندا دوز اولانا

آچیق دیر قاپیم منیم

 

 

یئر اوزونده بیر ائویم وار

اوردا نئچه ایللر دیر

طالعی بیر آرزوسی بیر

ایکی شاعیر عمر ائدیر

 

یئر اوزونده بیر ائویم وار

اوردا غمیم سئوینجیم

اوردان قدر ال چاتمایان

ایل لره عمور کؤچوم

 

azərbayjan

یئر اوزونده بیر ائویم وار

سانکی خیالا دالمیش

او منیم ایچون ان مقدس

ایستی آشیان اولموش

 

 

 

یئر اوزونده بیر ائویم وار

باتماز طوفان لار اونا

بینؤره دن باغلی دیر او

بو وطن تورپاغینا ...

بو وطن تورپاغینا ...

 


یازی نین آردی
یازان رافیق  | ثابیت لینک |

شفای وصل قدرین ، هجردن بیمار اولاندان سور
زلال ذوق شوقون ، تشنه دیدار اولاندان سور

لبین سرین گلیب گفتاره ، من دن اؤزگه دن سورما
بو پنهان نکته نی بیر واقف اسرار اولاندان سور

گؤزو یاشلی لارین حالین ، نه بیلسین مردم غافل ؟
کواکب سرینی ، شب تا سحر بیدار اولاندان سور

خبرسیز اولما فتان گؤزلرین قیدین چکن لردن
خبرسیز مست لر بیدادینی ، هشیار اولاندان سور

غمین دن شمع تک یاندیم ، صبادان سورما احوالیم
بو احوالی شب هجران ، منیم له یار اولاندان سور

خراب جام عشقم ، نرگس مستین بیلیر حالیم
خرابات اهلینین احوالینی ، خمار اولاندان سور

محبت لذتین دن بی خبر دیر زاهد غافل
فضولی ، عشق ذوقون ، ذوق عشقی وار اولان دان سور

یازان رافیق  | ثابیت لینک |

عزیز دوستوم جهانگیر گوندرمیشدیر :

بیر گویرچین کیمی دنسیز له میشم
بولبولم ، یازدا چمنسیز له میشم
اسکی دن شانلی شرفلی ائل ایدیم
ظالیمه قارشی آمانسیز سئل ایدیم
ذیروه سی چنلی دومانلی بئل ایدیم
ایندی مدت دی کی چن سیز له میشم
دردیمین یوخ آدی عنوانی دئسم
حیرته دالدیرار انسانی دئسم
باشقا سوزلرله بو معنانی دئسم
اوز دیاریمدا وطنسیز له میشم
درد منی یاندیریر ،آمما آدی یوخ
دئییرم من بئله منسیز له میشم
ای منیم من لیگیم ، ایمدادیما یئت
بیرجه گل ،منله گوروش ، دادیما یئت
منی باس باغرینا ، فریادیما یئت
بیلمیسن کی نئجه سنسیز له میشم

یازان رافیق  | ثابیت لینک |

ایستک لی دوستلاریمدان بیری ایندی سوئد مملکتینده یاشاییر . اؤزی تبریزده آنادان اولوب و ییرمی بئش ایل اوردا یاشاییب ، سونرا سوئده گئتمیشدیر . آذربایجانلی اولاراق ، درین دویغولو سئوگی سی واردیر آنادیلینه و آنا توپراقینا ! ایندی ییرمی ایله یاخین دیر کی غربت ده یاشاییر .  بیر نئچه گون بوندان قاباق ، بیر مکتوب آلدیم کی تبریزی بیرداها گؤرمک ایسته ییردی . مکتوبونو حزین حزین جمله لرله باشلاییب گؤزل شعرلر له سون قویموشدو . فیکیرله شیرم کی مکتوبون جاوابینی بئله باشلاییم :

 

   گوزل مکتوب دئنن هاردان گلیرسن

   اوره گیمده اولان دردی بیلیرسن

   آغلادیرسان گؤز یاشیمی سیلیرسن

   آه نه یامان آلوولانان کؤزون وار

   اولما ینه آنادیلده سؤزون وار

 

  یولون اوسته نئچه داغدان کئچمیسن

  اوراخ اولوب نئچه خرمن بیچمیسن

  نئچه بولاق گؤروب سویون ایچمیسن

  واللاه بیری آذر یوردونا چاتماز

  من بیلیره م دونیا باتسا ، او باتماز

 

   آذر ائلی وورغونی دیر داغلارین

   گوی بورونن کولگه سالان باغلارین

   آراز سویون مارال اؤپن چاغلارین

   آه نه گؤزل گول چیچکلی درؤن وار

   بیر سوروده آغون بوزون قرؤن وار

 

   سندن الهام آلیب ماهنی قوشانلار

   کول دیبیندن قالخیب قاچان دوشانلار

   کوراوغلی تک ظلمه ساری جوشانلار

   یوخدی هئچ نه گؤزلریمده تای سنه

   بوللی باخیب گؤنده ره رم پای سنه

 

یازان رافیق  | ثابیت لینک |

شهریاریم ... 86/06/26 23:32

ائل شاعری " شهریار " ین کؤچوب گئتدیگی گونون ایل دؤنومی ایله باغلی ، آذربایجانین ایگیت شاعری " عاصم اردبیلی " نین شهریاریم عنوانلی شعری بوردا گتیریرم . من نه زامان اونو اوخودوم ، گؤزلریم دولدو . بو شعرده یاشایان دویغونو چوخدان دیر اؤزگه شعرده تاپا بیلمیرم . تقدیم ائدیرم اولو شاعریمیزین یادی ایله ...

 

اوستاد شهریار

شاعریم ، شهریاریم ، افتخاریم ، سئومه لی یاریم

آی منیم شان و وقاریم

گئتدین حیدر بابانین ذیروه سینی سیس دومان آلدی

باغری قان لاله لرین شاختا ووروب ، قار بوران آلدی

سنی بیزدن زامان آلدی

 

نه یامان گونده بو داغلی ائلین آرامینی آلدین

اؤزون آق کورکی گئییب ائل باشینا قاره نی سالدین

گؤیدن ایلهامینی آلدین

 

اولما " اولدوز سایاراق " انتظاری باشه یئتیردین

اولما سورگون یاشایان قارداشی قارداشه یئتیردین

اولمایا آیری دوشن قاره گؤزی قاشه یئتیردین

اللری باشه یئتیردین !

 

سن کی آذر ائلینی آتمازیدین ، نولدوکی آتدین ؟

سن کی " گؤزلر یاتاراق " یاتمازیدین ، بس نیه یاتدین ؟

سن کی یادلاره ائلین ساتمازیدین ، اولمایا ساتدین ؟

نییه اولدوز کیمی باتدین ؟

کیمی دوتدون ، بیزی آتدین ؟

 

کؤنلوموزده ینه قات قات یاتیشیب داغلار اوجالدی

دییه بیللم اوجالیقدا ساوالاندان دا باج آلدی

دن دوشوب ساچلارا زر تئللی گلین لر ده قوجالدی

نه بیلیم بلکه ده شیطان ینه دیرناغینی دیرناغینه چالدی

نفاقین بذرینی اکدی ،

هیجرانین طرحینی تؤکدی

 

بیر زامان حافظین عطرین ائلیمیز سندن آلاردی

زهره چنگ الده دوتوب صوبحه دک ایواندا قالاردی

سن اوخوردون او چالاردی ،

ظلماتین باغرینی یاردیقجا ، گؤیه سس اوجالاردی

عالمه لرزه سالاردی

طبعی نین ساغری داشدیقجا ، یئره اینجی جالاردی

شعری شعر اوسته قالاردی

 

بیر زامان سن ائلیمین نغمه قوشان بولبولو اولدون

بیر زامان یوردوموزون عطر ساچان سونبولو اولدون

گئتدین آذر ائلی نین بیر یارالی نیسگیلی اولدون

" حقه دوغرو نه قارانلیق ایسه ائل مشعلی اولدون "

دئدیگین حوری لره ایندی گئدیب سئوگیلی اولدون

ابدیت گولو اولدون

 

الی بوش گئتمه دین آنجاق ، ائلیمیزدن یاز آپاردین

سن ادب باغچاسی نین گول چیچکیندن ناز آپاردین

حوری لر بزمینه سؤزلو سینه ن ایچره ساز آپاردین

شوریله شهناز آپاردین ،

دئمیرم چوخ ، آز آپاردین ...

 

نئجه سن سیز یاشاسین ائل لرین اوغروندا جوشانلار

کیمدن ایلهامینی آلسین حایاتا نغمه قوشانلار

کلمه لر له دوتوشانلار

گئجه گوندوز چالیشانلار

چالیشارکن آلیشانلار

 

سن گئدن دن ، ادبیات باغی نین گول لری آغلار

ساری سونبول لری آغلار

اولکه میز یاسه باتاندان ، سونا بولبول لری آغلار

کوکره ییب قانلی آراز ، کور چایی نین سئل لری آغلار

عاشیقین گؤزلری آغلار

سازینین سؤزلری آغلار

موغانین دوزلری آغلار

اوتای آغلار ، بوتای آغلار

ماوی گؤی لرده آی آغلار ...

 

سنده دستانینی قوشدون او ایگید شانلی سهنده

باشی توفانلی سهنده

دوندو حیدربابانین قصه سی دستانلی سهنده

اوره یی قانلی سهنده

ده لی جیرانلی سهنده

یئنی دن داردا قالیب ، سانکی بیر اصلاندی ، باغیردی

داغلانار کن اوره یی داغلاری امداده چاغیردی

 اوستاد شهریار

قوجا حیدربابامیز داغلاناراق ، اولدو دایاق سیز

اوبا سسدن دوشره ک ، قالدی اوره ک لرده قولاق سیز

ساری سونبول لرینی شاخدا ووروب بیچدی اوراق سیز

اود دوتوب یاندی اوجاق سیز ...

 

آرازین آیناسی کاسلاندی ینه غمله یاناشدی

دوشلریندن ساوالان میثلی سهندین سودو قاشدی

ینه غم لر قاطاری توزلو یاناقلاردا ایز آشدی

گؤزلرین کاسه سی داشدی

سئل اولوب باشلاری آشدی

قارا یئل اسدی خیالین آتی دوز یولدادا چاشدی

 

آمما حیدربابانین شهرتی دونیایا یاییلدی

شهریار باتدی سا ، یوخ عیبی ، یاتان گؤزلر آییلدی

ایل لر آی سیز یاشادی اؤلدوکی اولدوزلو ساییلدی

اوزو گئتدی آدی قالدی

آغزیمیزدا دادی قالدی

 

دئدی حیدربابایا ، دونیا یالان دونیادی آنجاق

شهریارداندا اثر قالسا ، قالار بیر آدی آنجاق

او آدی اولماز اونودسون وطنین اولادی آنجاق

باشینا آند ایچر ائل لر

اونا مسکن دی کونول لر

پایلایار عطرینی گول لر

آپارار هر یانا یئل لر

سسینه سس قوشو سئل لر

قیرا زنجیرینی اصلانلاریمیز قالمایا داردا

جوشا غیرت قانی بلکه بو سویوق قانلی داماردا

یاشایاق شانلی باهاردا

محو اولا شاخدادا قاردا

 

کاروانین باشچیلینی چالدی اجل چنگی آپاردی

او گئنیش روحونا دونیا قفسی بیلدی کی داردی

آخ نه توفان ، کی ادب باغچاسی نین ایچره قوپاردی

اوکی اولدوزلارا سوز اینجی سی مین غمزه ساتاردی

سوزه ن اولدوزلارا دوندو ، عومرونون مشعلی سوندو

 

او همان سلطان ایدی خدمته چکمیشدی صبانی

طی ائدن کون و مکانی

دوگه سلطان ریاضی قاپوسون صبح زامانی

تاپا علمین آتاسین سیرده اندیشه باغیندا

اونا مین نکته نی آیدینلادا ان خسته چاغیندا

دییه ، دشمن گتیریب دیر اله فرضیه نی اوستاد

آتمین بومبی ائدیر عالم انسانلیغی برباد

اوز نبوغونله اوره ک لر ائوینی ائتمه سین آباد

جنگین عفریتی چکر کامینه انسانلاری بیر گون

بویایار آل قانا دونیانی آخان قانلاری بیر گون

 

او همان باغبان ایدی ، گول لری ایستردی تیکان سیز

دده قورقود کیمی داغلار باشین ایستردی دومان سیز

او همان گوهر ایدی عالم امکان دا مکان سیز

جانلی ایستردی اووی ، اووچونو جان سیز

یوردون ایستردی خزان سیز

 

او همان قارتال ایدی کهلیگی سالمازدی نفسدن

اوخیان بولبول ایدی باد خزان سالمادی سسدن

باغیران اصلان ایدی ، واهمه ائتمزدی قفسدن

قوجامان شاعریدی ، شعرین آییرمیشدی هوس دن

سوزونه عشقی واریدی

اؤزو آلاهه ساریدی

شانلی حیدربابانین تورک ائلینه یاز نوباری ایدی

دادلی – دوزلو غزلی ، کوتله لرین شام ناهاری ایدی

سوزو دوزگون عیار ایدی

گئجه لر صوبحه کیمین همدمی توزلو سه تاری ایدی

تاری عمری ایله یاری ایدی

" عاصمین " ده باشی نین کؤلگه سالان شهریاری ایدی

آمما افسوس بویاز شهریارین سون باهاری ایدی

ال لر اوستونده گئدن قبره ، ائلین نازلی یاری ایدی .
یازان رافیق  | ثابیت لینک |

 

اولدوز ساياراق گؤزله ميشم هر گئجه ياري

گئج گلمه ده دير يار يئنه اولموش گئجه ياري

گؤزلر آسيلي يوخ نه قارالتي نه ده بير سس

باتميش قولاغيم گؤر نه دؤشورمكده دي داري

بير قوش ‹آييغام› سؤيله يه رك گاهدان اييلده ر

گاهدان اونو دا يئل دئيه لاي لاي هوش آپاري

ياتميش هامي بير آللاه اوياقدي داها بير من

مندن آشاغي كيمسه يوخ اوندان دا يوخاري

قورخوم بودو يار گلمه يه بيردن ياريلا صبح

باغريم ياريلير صبحوم آچيلما سني تاري !

دان اولدوزو ايستر چيخا گؤز يالواري چيخما

او چيخماسادا اولدوزومون يوخدو چيخاري

گلمز تانيرام بختيمي ايندي آغارار صبح

قاش بئيله آغارديقجا داها باش دا آغاري

عشقين كي قراريندا وفا اولماياجاقميش

بيلمم كي طبيعت نيه قويموش بو قراري

سانكي خوروزون سون باني خنجردي سوخولدو

سينه مده اورك وارسا كسيب قيردي داماري

ريشخندله قيرجاندي سحر سؤيله دي دورما

جان قورخوسو وار هركيم اوتوزموش بو قوماري

اولدوم قارا گون آيريلالي او ساري تئلدن

بونجا قارا گونلردي ائدن رنگيمي ساري

گؤز ياشلاري هر يئردن آخارسا مني توشلار

دريايه باخار بللي دير چايلارين آخاري

از بس مني يارپاق كيمي هجرانلا سارالديب

باخسان اوزونه سانكي قيزيل گولدو قيزاري

محراب شفقده اؤزومو سجده ده گؤردوم

قان ايچره غميم يوخ اوزوم اولسون سنه ساري

عشقي وار ايدي شهريارين گوللو چيچكلي

افسوس قارا يئل اسدي خزان اولدو باهاري

یازان رافیق  | ثابیت لینک |

بو شعری " سارای " درگی سیندن کی اردبیل ده چاپ اولونور گتیرمیشم . یازانی لطفعلی فیکرت بیله سوار دان گوندرمیش دیر .

 

 

اوره گیم باغلی بیر قارا تئل ده دیر

بئله بیر گوزل لیک بیزیم ائل ده دیر

 

سازلی دیر سؤزلی دیر مین عاشیقلی دیر

کؤنول گؤزل لره دولاشیقلی دیر

هنر بو دیارا یاراشیقلی دیر

بئله بیر گؤزل لیک بیزیم ائل ده دیر

 

بوتون گرامه لی دیر اوباسی ائلی

زامان دفترینده آغاران تئلی

منه وارلیق اولان آنامین دیلی

بئله بیر گؤزل لیک بیزیم ائل ده دیر

 

بوتون اوره ک لرده قالیب بو عنوان

دییب وطن اوغلو بو سؤزی هر آن

نه گؤزل یاراشار موغانا جیران

بئله بیر گؤزل لیک بیزیم ائل ده دیر

 

قیشلاقی وار اوباسی وار بو ائلین

سای سیز ایگیت بالاسی وار بو ائلین

خان چوبانی ساراسی وار بو ائلین

بئله بیر گؤزل لیک بیزیم ائل ده دیر

 

سهنگی چیگنینده نازیلان هله

گلیر بولاق اوستن یار گوله گوله

مین اوره ک باغلانیب قارا بیر تئله

بئله بیر گؤزل لیک بیزیم ائل ده دیر

 

چیچک لر قول بویون اولوب ساللانیر

باخدیقجا دونیادان بشر ذوق آلیر

اوتوروب بیر یاندا چوبان نی چالیر

بئله بیر گؤزل لیک بیزیم ائل ده دیر

 

آلاچیق هم کؤمه بیر ویقار بیزه

آران یایلاغی میز اعتیبار بیزه

مینیب آت بئلینده گلیب یار بیزه

بئله بیر گؤزل لیک بیزیم ائل ده دیر

 

حاق سلامی هم چوره گی دوزو وار

یاشماقلار آلتیندا مین اولدوزو وار

حیالی عصمتلی گلین قیزی وار

بئله بیر گؤزل لیک بیزیم ائل ده دیر

 

بوداغ لار دؤشونده گئچمیشیمیز وار

عشقین سینه سینده اؤروشوموز وار

ساوالان لا هئله گوروشوموز وار

بئله بیر گؤزل لیک بیزیم ائل ده دیر

 

لاله لر تک باغریم ائوی داغلی دیر

دوگون دوگون عشقیم سیزه باغلی دیر

فیکرت ده بو ائلین هنر اوغلو دیر

بئله بیر گؤزل لیک بیزیم ائل ده دیر

یازان رافیق  | ثابیت لینک |

بو شعری قاراباغلی" حسن میزه " یازمیشدیر . قاراباغ دا و گؤیچه ده باش وئرن محاربه چوخلارین دیدرگین سالیب و اؤز ائلیندن اوباسیندان آییریب دیر . بو شعر ده شاعیر گئچمیش گونلرین یادا سالاراق ، اؤز دوغما دیارین اوخشاییر و گؤزل تشبیه لردن ایشلدیر . گون او گون اولسون آذربایجانیمیزین بو حیصه سی ده اؤز مطلق آزادلیغینی اله گتیرسین ... یاشاسین گؤزل آذربایجان !

 

اوشاقلیغیم ، ان خوش چاغیم

سنده گئچیب سنده داغلار

اتگینده باغچا باغین

قالیب مندن گئن ده داغلار ...

 

هانی او اوغوز ائل لری

نه دن سولوب دیر گول لری

نیه لال اولوب دیر دیل لری

سوسما دیل لن سنده داغلار ...

 

یوردومدا ائلین گؤرونمور

اوجاق لارین یانیب سونمور

یان توتک ین سسی گلمیر

دؤز بو درده سن ده داغلار ...

 

گؤیچه گؤل دن دومان ائنه

گؤی تپه دن چن سورونه

یاغیشدان سونرا گؤرونه

گؤی قورشاغی سنده داغلار ...

 

قوزی قولاغی دوزنان اووام

قار آلتیندان یارپوز ییغام

دوست تانیش نان مجلس قورام

یاتام قالام سنده داغلار ...

 

سما اوجا ائنن میرم

قوجاغینا گلن میرم

سنی قویوب گئدنمیرم

روحوم قالیر سنده داغلار ...

 

لاله لر اؤرپک شالین دیر

چیچک لر خالچا خالین دیر

" حسن میرزه " قوناغین دیر

ده قالسین می سنده داغلار ... ؟

 

بو شعرین سسلی فایلینی بوردان یوکله یین !

یازان رافیق  | ثابیت لینک |