معجز شبستری کیم دیر ؟
من اؤلوم ملا بیزیم خان کیشینین قانینه باخ
ائوینه منزلینه ملکونه ایوانینه باخ
پولونا آل وئرینه ثروت و سامانینه باخ
نفسینه حرصینه انصافینه وجدانینه باخ
گؤر بو قانیله بونون شانینه احسان یاراشیر ؟
یا هئله ییغماغا پول ائتمگه میلیان یاراشیر ؟
بویله بیر شخصه روادیرمی قیل احسان دیه لر ؟
آج یازیق کیمسه دگیل دیر ، یئمگه وار چؤره کی
یئمگه وار چوره ک ، امما بونا دوزمیر اوره کی
هوسی ییغماغادیر ، ییغماغادیر هر گره کی
آرزوسی واردی کی آلتیندان اولایدی دیره کی
گؤر بو نیت له بونون شانینه احسان یاراشیر ؟
یا هئله ییغماغا پول ائتمگه میلیان یاراشیر ؟
بویله بیر شخصه روادیرمی قیل احسان دیه لر ؟
وار سوری ایله قویونی ، ایلخی ایله آت اوکوزی
اولسادا مین بو قدر مال قاراسی آج دی گؤزی
ائله ییر سجده پولا ، بو سؤزه قائیل دیی اؤزی
سانما بهتان آتیرام ، کندی دیور اشبو سؤزی
گؤر بو حرص ایله بونون شانینه احسان یاراشیر ؟
یا هئله ییغماغا پول ائتمگه میلیان یاراشیر ؟
بویله بیر شخصه روادیرمی قیل احسان دیه لر ؟
قوجالوب اوتمه دیر یئتمیشی هشتادی یاشی
یوخدور اوغلی اوشاقی ، بیر قاری دیر بیرده باشی
گون به گوندن چوخالوب آرتمادیر ملکی ، ماشی
دوز دگیل آرشینی اولچوسی ، ترازوسی داشی
گؤر بو نفس ایله بونون شانینه احسان یاراشیر ؟
یا هئله ییغماغا پول ائتمگه میلیان یاراشیر ؟
بویله بیر شخصه روادیرمی قیل احسان دیه لر ؟
گؤنده اون شاهی ایله جمله اموری دولانیر
باوجودی کی دمادم عملی زوربالانیر
باشقاسی پول سانیاندا بونون آغزی سولانیر
باشلیور هورمگه نفسی ، طمعی قورجالانیر
گؤر بو نفس ایله بونون شانینه احسان یاراشیر ؟
یا هئله ییغماغا پول ائتمگه میلیان یاراشیر ؟
بویله بیر شخصه روادیرمی قیل احسان دیه لر ؟
دییره م اؤلمکینی آی کیشی بیر آل نظره
عورتین مالین ایله چاتمالیدیر باشقا اره
ال بولاشدیرما دیور کار قضا و قدره
بلکه مندن قاباق عورت جوماجاقدیر سقره
گؤر بو نیت له بونون شانینه احسان یاراشیر ؟
یا هئله ییغماغا پول ائتمگه میلیان یاراشیر ؟
بویله بیر شخصه روادیرمی قیل احسان دیه لر ؟
دییوره م باری بیرآز پول آییر احسانین اوچون
مکتبه وقف ائله خیرات اولاراق شانین اوچون
سویله ییر گئت بو دوعانی اوخو اؤز جانین اوچون
وئرمره م بیر قارا پولدا بئله هذیانین اوچون
گؤر بو غیرت له بونون شانینه احسان یاراشیر ؟
یا هئله ییغماغا پول ائتمگه میلیان یاراشیر ؟
بویله بیر شخصه روادیرمی قیل احسان دیه لر ؟
ملا ، بو باره ده زحمت ده اگر اولسا سنه
یاز بیزیم اهل معارف لره اعلان ائله تا
بیرده مکتب پولی وئر سویلمه سینلر بونا ها
دون ائشیتدیم کی داخی ائتمیه جک شرم و حیا
آپ – آچیق سویلیه جک : وئرمیرم آ ... وئرمیرم آ ...
گؤر بو شرم ایله بونون شانینه احسان یاراشیر ؟
یا هئله ییغماغا پول ائتمگه میلیان یاراشیر ؟
بویله بیر شخصه روادیرمی قیل احسان دیه لر ؟
